Ardley ‘Archi’ Jansen ta bira mènedjer di Wild Cats

171
Ardley “Archi Jansen mènedjer di Wild Cats den 2019 huntu ku e hòmber di mas importante den Wild Cats Manfred “Fretje Steinbrenner” Gomez. Aki nan dos durante e último anochi di festival di Tumba 2019.
Willemstad,– No tin duda ku ora ta trata notisianan di beisbòl Vigilante sigur ta trese e bèrdat pa su lesadónan.

Informashon ku nos a haña ta indiká ku e ekipo di Wild Cats, manera nan a anunsiá adelantá,  a skohe nan mènedjer pa temporada 2019 despues ku festival di Tumba a finalisá i nan ta anunsiá Ardley ‘Archi’ Jansen komo mènedjer di e ekipo.

Hopi tabata spekulá esaki i tabata probabel ku e lo a bira mènedjer, pero tabatin mas kandidato i konsekuentemente mester a warda esaki bira ofisial.

Awor e ta ofisial i vigilante a papia ku Ardley mes, kende a splika Vigilante ku bèrdat el a bira mènedjer i ku ta for di dia di inskripshon di Tumba kasi por bisa ku e desishon a ser tuma.

Archi a splika nos ku su intenshon na promé lugá ta pa usa hungadónan hóben di manera ku por krea un ekipo hóben riba tereno. El a bisa Vigilante ku e sistema ku e ta bai usa ta ku e gainan hóben ta bai haña tur chèns di mundu pa nan demostrá nan talento i demostrá ku nan ta kla pa hunga den “AA”.

“Tin hende den direktiva ku ta insistí pa mi hunga i pa kumpli ku nan mi a pone mi mes nòmber komo hungadó tambe, pero e intenshon no ta pa mi bai hunga”, asina Archi a splika Vigilante.

Jansen ta bisa ku si pa urgensia e mester ta den wega, e dia ei e lo no mete mes ku maneho i lo laga esaki e ora ei den man di su kuerpo tékniko.

E kuerpo tékniko lo ser forma pa Franky Confesor kende ta esun tambe enkargá ku plannan di trenen, Fermin Coronel kende ta e koach di picheo, Remick Bernadina koach di tersera base i Darren d/c Gomez lo ta e koach di primera base.