Chonki 9 febrüari : E kousa di e konfushon por ta un eskoho di palabra Señor Clift Christiaan no ta enkabesá PMO mas

311
Señor Marcelino ‘Chinki’ Delanooi a bisa ku señor Clift Christiaan no ta forma parti di e grupo di ekspertonan aki i lo no ta parti di PMO mas.
Willemstad,– Trahadónan di Refineria Isla ketu bai ta den un inseguridat i ta pidi klaridat mirando ku segun nan tin manera un bailamentu den e asuntu di Clift Christiaan.

E trahadónan ta bisa ku e kartanan ku nan a haña tantu di gobièrnu komo di RdK riba djabièrnè siman pasa, no ta papia palabra kla pa ku e asuntu di señor Christiaan. Den kombersashon ku un grupo di trahadó ayera, nan ta splika Vigilante ku nan no ta komprondé dikon gobièrnu i/òf RdK, no por simplemente bisa ku señor Clift Christaan no ta forma parti mas di e tim negoshadó di RdK i no tin nada di bisa mas den e asuntu dui buskamentu di partner nobo pa operashon di e refineria. E trahadónan ta bisa ku tin un biramentu rònt ku e asuntu aki, kual ta duna hende di pensa ku tin algu den e kos aki.

Despues ku djabièrnè nan a haña un karta ku ta papia kla di señor Chonki de Lanooi, djadumingu nan a haña un otro karta kaminda ku señor de Lanooi ta papia di hungamentu ku palabra i mal interpretashon, pero segun e trahadónan, De Lanooi sa bon bon kiko el a skibi i pa kiko el a skibi e karta di djabièrnè asina, siendo despues ku trahadónan a  reklamá el a skibi un otro karta djasabra pa e sindikatonan.

Karta 9  febrüari

“Ayera mi a informá boso di e desishon ku mi a tuma pa ku restrukturashon di PMO , mi ta komprondé awor ku e mensahe ku mi  a manda a krea konfushon bou di boso miembronan.

Miembronan tabatin un otro interpretashon di e desishon ku mi a tuma . E kousa di e konfushon por ta un eskoho di palabra ménos klaro di ámbos banda. Sin bai den detaye di esaki, mi ke aklará e desishon tumá i amplia riba esaki por eskrito na papiamentu na un manera ku tur hende por komprondé”.

Entrante 8 di febrüari 2019, e departamentu ku ta enkargá pa buska partner stratégiko nobo pa operashon di nos refineria, ku ta PMO, lo kambia. Na kabes lo tin un komishon ku ta konsistí di máksimo tres persona. E personanan aki ta mi mes persona (pa un periodo temporal), Arthur Gevers i un otro persona ku mi tin ku apuntá ainda. Esaki kiermen ku señor Clift Christiaan no ta enkabesá PMO mas .(dikon a no a bini asina djabièrnè, ta loke e trahadónan ta puntra).

Un di e ekspertonan den PMO lo ta señor Errol Cova , ku kende nos tin un kontrakt kaba pa su kompetensia riba tereno di rekurso humano i relashonnan internashonal. Señor Clift Christiaan no ta forma parti di e grupo di ekspertonan aki i lo no ta parti di PMO mas.

Pa por fasilitá e kambio i traspaso na e organisashon nobo, nos ta bai usa e siman aki pa señor Clift Christiaan hasi “hand over” pa asina no stroba lokual ku ta andando kaba. Vigilante a buska pa drenta kontakto ku Meyer di PWFC i Remilia di APRI, pero niun di dos no tabata alkansabel.