Dòbel asesinato den Koraalspecht

673

Willemstad—– Kòrsou a registrá djasabra último su di kuater kaso di asesinato unda dos hóben a bin pèrdè nan bida den e  bario di Koraalspecht.

Víktimanan no tabata masha leu for di otro.

Djasabra 9 di febrüari alrededor di 19.15’or, Sentral di Polis a risibí yamada di un kaso di tiramentu ku tabata tumando lugá riba Koraalspechtweg.  Mesora a dirigí diferente unidat na e sitio.

Na yegada di e promé unidatnan, nan a bin topa dos hòmber drumi abou kantu di kaya, ku diferente herida di bala na nan kurpa.  Un vehíkulo den besindario tambe a risibí perforashon di bala.  Inmediatamente a pidi presensia di ambulans, pero na nan yegada, no por a hasi nada mas pa e dos víktimanan.

Dòkter di Polis a presentá pa asina por a konstatá morto.

Dòkter di polis ku a yega na e sitio a konstatá morto di e dos hòmbernan.

Un di e víktimanan a keda identifiká komo Signald Dionisio Richart Quammie, nase na Kòrsou dia 27 di aprel 2001.

E otro víktima su identidat te ainda no ta konosí pa polis, miéntras ta kontinuando ku e investigashon pa sa kiko a sosodé ku a kondusí na morto di e dos víktimanan aki.

Un súplika ta bai na tur siudadano ku tin informashon tokante di loke a tuma lugá relashoná ku e kaso aki, pa tuma kontakto ku polis na 917 òf e liña anónimo 108. Di parti di vigilante nos ekstendé palabranan di kondolensia na famia di ámbos difuntu ku pèrdida di nan ser kerí.