Entrada di Cova bèl den PMO ta sla polítiko pa PAR

97
Na mesa: un bista di minister nan na mesa ta splikando sindikato riba maneho i aspekto nan interno di RdK i Refineria Isla. Finalmente djasabra sindikato nan a duna tur tres koalishon nan derota polítiko.
Punda–  Ta bisto ku gobièrnu di Kòrsou a faya ku reglanan vigente den Corporate Governance i ku konsekuentemente esei a kosta na un derota serio kontra di e dos sindikatonan PWFC i APRI.

Tur minister den kabinete Rhuggenaath ku a atendé dirèkt ku miembro nan di sindikato,  paga e preis despues ku djasabra atardi, direktor di RdK, Chonki de Lannoy a konfirmá ku sindikato nan a logra inkorporá Errol Cova bek den e PMO, ku ta negoshando pa un sosio nobo. Pa lokual ta trata e aspekto di Corporate Governance tin un liña fini pero firme pa lokual ta trata kon leu akshonista, den e kaso aki gobièrnu, mester mete den maneho di su kompania nan anónimo.

Mei mei: de Lannoy mester a risibí outorisashon masha dia pa “handle” e asuntu na nivel di gerensia.

Sondeo di un sosio stratégiko por ehèmpel ta un desishon di akshonista pero ehekushon ta den man di maneho di e kompania via di su direktor nan kende na turno por ta skohe miembro nan di e PMO. E Hunta di Komisario i su presidente (Gilbert Martina) ta responsabel pa guia i eskoho i kumpli ku e kondishon nan stipulá pa akshonista, den e kaso aki gobièrnu di Kòrsou.

Den e kaso na RdK, e liña di komunikashon menshon no a wòrdu apliká i konsekuentemente minister nan a salta e nivel di e Hunta di Komisario i komuniká dirèkt ku sindikalista nan. Ademas a diskutí, dirèkt riba maneho di RdK. Ku otro palabra, polítika/akshonista, a entremeté den aspektonan operashonal di RdK. E problema aki no solamente a tuma lugá na RdK, sino ta tumando lugá diariamente na tur kompania nan anónimo di gobièrnu i su fundashon nan. Miéntras minister nan na Kòrsou no realisá e importansha den separashon di outoridat i ehekushon di maneho, nan ta e kousante nan mas grandi di tur problema den e kompania nan anónimo. Den kas di RdK, n’e momentu aki, hasta tur partido polítiko den koalishon, a pèrdè hopi sosten.