Indikashon ku dòbel asesinato tin aber ku ripdeal pa arma

801
Willemstad— Polis sigur ta riba e bon kaminda i lo no bai dura masha ku lo tin e promé detenshon pa e kaso lamentabel di dòbel asesinato kua  tuma lugá djasabra den oranan di anochi den e bario di Koraal Specht.

Informashon ku Vigilante a bin ta disponé di dje ta ku tin mas hende envolví den e kaso di dòbel asesinato pero ku si a logra di keda na bida. Asta na e sitio tabatin un pareha turista ku a para mira tur kos kon e asesinato a tuma lugá. For di fuentenan ku ta na altura di loke a pasa por a bin komprondé ku ta un kompra di un arma di kandela a bai robes. Ta ser bisa ku ta trata di tres hóben ku mester a bai den e bario di Koraal Specht pa asina kumpra un arma di kandela na e balor 2500 florin. Durante di e transakshon pa e arma di kandela algu a bai robes ku a pone ku e bendedonan di e arma a logra di kita e sèn for di e tres hóbennan laga nan bai sin nada. E tres hóbennan mester a bai bek serka e doño di e sèn pa asina splik’é ku esun ku ta bende e arma di kandela mester a kita e sèn for di nan sin a duna e arma di kandela. Esaki a pone ku e doño di e sèn a rabia formalmente i einan a bin surgi e tiramentu unda a bin bashamentu di bala riba e trio. Segun e fuente un di e hóbennan si a logra di kore bai unda asta tin indikashon ku bala mester a sea skarmai e òf alkanse na su pia. Lo no bai dura ku e promé detenshon lo bai kai den e kaso aki ya ku sigur polis tin basta indikashon kon tur kos a tuma lugá. Si Polis ta pidi un i tur ku sa mas di e  kaso aki pa tuma kontakto ku nan na e number 108 i of 917.