Ofisial militar haltu ta deskonosé Maduro komo presidente

88
Parti di e grabashon ku a keda publiká riba retnan sosial.

CARACAS – Un terser ofisial di forsa armá venezolano a anunsiá ku e ta rekonosé e kabesante di Asamblea Nashonal i lider opositor, Juan Guaidó, komo presidente enkargá di Venezuela.

E koronel aktivo di ehérsito, Rubén Paz Jimenez, den un mensahe ku a keda publiká riba retnan sosial, a indiká ku e ta deskonosé Nicolas Maduro komo presidente i den mesun rosea a pidi kompañeronan di arma pa respaldá Guaidó, kende luna pasá a outo deklará su mes komo presidente enkargá di Venezuela.

Den su mensahe esaki a indiká ku nan mester ta balente, i no mester tin miedu. Esaki ademas a indiká ku un 90 porshento di forsa armá ta den un mal kontentu. Segun nan, nan ta keda utilisá pa mantené nan mes na poder.

Esaki, kende tambe a identifiká su mes komo un médiko, a pidi militarnan pa permití ingreso di yudansa humanitario na e pais, Venezuela.

Paz Jimenez ta e segundo ofisial ku ta rebeldiá kontra Maduro den un siman di tempu. E general aktivo Francisco Esteban Yánez Rodriguez, kende ta elaborá den e Direkshon di Planifikashon Stratégiko di Aviashon, a a anunsiá for di dia 2 tras di lomba, den un video, ku e ta deskonosé e mandatario. Esaki ademas a pidi kompañeronan militar pa no bira lomba pa nan pueblo.