Segun Lutson Lucas STSK ta alegá ku SITEK ta usa nan puntonan den negosashon

183
Apesar di diferensha di opinion ku SITEK, Lutson Lucas di STSK ta bisa ku komo Sindikato nan ta sostené e dosentenan, esta e dosentenan ku ta den akshon i ta mustra solidaridat ku nan pa nan lucha hustu.
Willemstad,– Señor Lutson Lucas di Sindikato STSK ta splika ku tin algu insolito i bergonsoso ta tumando lugá.
E ta splika ku no ta promé biaha ku ora ku Sitek tin su akshon e ta kue puntonan di Sindikato STSK hinka den su puntonan di atenshon i eksigí gobièrnu/Minister di enseñansa pa atendé ku su Sindikato, pues un akto di mala fe i baho pa e mundu Sindikal, pero no esei so, segun señor Lucas, Minister i tambe gobièrnu ta sukumbí pa su preshon i bruamentu di tera. “Nos komo Sindikato STSK a pone tantu Minister di enseñansa i tambe Promé Minister na altura ku nos no ta aseptá pa niun Sindikato kue nos punto i gobièrnu bai atendé ku nan riba nos asuntunan i si esaki sosodé tòg Gobièrnu ta obligá nos di mobilisá Sindikalmente ku tur e konsekuensianan ku esaki por trese kuné”, asina e lider di e sindikato STSK ta trese dilanti.  E ta bisa ku STSK komo Sindikato sostené e dosentenan, esta e dosentenan  ku ta den akshon i ta mustra solidaridat ku nan pa nan lucha hustu, esaki Sindikato ta para pe, segun Lutsen Lucas.

“Nos kier pa pueblo di Kòrsou pa ta na altura tokante di moveshonnan anti-sindikal ku tin ta tuma lugá i si yega asina leu ku nos tin ku uza nos arma Sindikal, pa pueblo di Kòrsou tin komprenshon i tene pasenshi pa ku nos paso lo no ta bai ta nada dushi”, asina e sindikato STSK ta bisa.

Por último nan ta bisa ku STSK ta sostené e akshon hustu di e trahadónan, esta e trahadónan di SITEK ku awor aki ta den akshon pa nan lucha hustifiká, esaki un Sindikato ta para pe.