Sindikato ta konta ku PDVSA

45
Parera—Sindikatonan envolví na Refineria Isla ta konta ku PDVSA mes lo ta un kandidato firma pa un “emergency plan” den kuadro di suministro di krudo na nos refineria nashonal. Esaki ta lokual Angelo Meyer a duna di konosé djasabra mèrdia durante un rueda di prensa.

Segun Meyer, miéntras e PMO, Project Management Organization’ pa yega na un sosio stratégiko ta buskando sosio nobo, PDVSA kisas lo ta dispuesto pa temporalmente sigui suministrá petroli pa e refineria na Kòrsou rafiná. E reakshon di Meyer a bini despues ku Marcelino Chonki de Lannoy, direktor interino di Refineria di Kòrsou, a duna splikashon riba e proseso pa buska un sosio stratégiko. Segun de Lannoy, wikènt tras di lomba a firma un karta unda a keda konfirmá ku sr. Clift Christiaan ta pafó di e PMO i na su lugá a pone Errol Cova. Entretantu, for di wikènt tras di lomba, segun relashonista públiko Earl Balborda e refineria a pone su último planta abou. Aktualmente no tin krudo pa rafiná na Kòrsou. Meyer, a divulgá ku nan tin kontakto ku PDVSA i tin e posibilidat ku PDVSA ta dispuesto na sigui suministrá petroli.