Situashon peligroso ta pone dama di 70 aña trompeká i kai

159
Caracasbaai- Djasabra den oranan di anochi un dama di edat mester a keda leshoná. E dama aki mester a sali kas pa bai tienda i na momentu ku e tabata kana riba e asera Oude Caracasbaaiweg e mester a trompeká i kai riba su kachete.
Un bista di kon e dama su kachete e a keda despues di e kaida

E dama di 70 aña di edat aki mester a keda leshoná kaminda ku e la kap su kachete, tambe na e momentu ei e no tabata kòrda masha bon loke a pasa kuné. Vigilante a kombersá ku un miembro di famia i e la splika nos ku e situashon aki tin algun dia kaba ku un kompania mester a koba den e área di Oude Caracasbaaiweg. Esaki ta difikultá e kanamentu riba asera pa motibu ku tin yen buraku habri. Tambe ku na momentu ku bo bai kana riba kaya e kaminda ta asina suku ku outonan ta bin i nan por dal bo. Nan ta urgí pa e instansha konserní pa por tuma akshon i remediá e situashon pa evitá kualke otro insidente.