…Ta falta solamente Roderick Bernadina… Rupert ‘Kabuya” Ustasia a firma ku “La Familia” Santa Rosa Indians

229
Santa Rosa Indinas “La Familia” ayera a logra haña firma di Rupert ‘Kabuya’ Ustasia kende temporada pasa no a hunga i a bira liber. Riba e foto por mira momentu ku Rupert ta pone su firma den presensia di e mènedjer Quincy Martina i Jerred Diun. d
Willemstad,– E notisianan den beisbòl “AA” ta aki bo ta haña nan i kos ta sigui kayente apesar ku nos ta den temporada di Karnaval.

Den forma di eksklusividat Vigilante ta trese pa bo ku e ekipo di Santa Rosa (La Familia) a probechá di e dia liber di Tumba djaweps anochi i a firma e infielder Rupert ‘Kabuya’ Ustasia despues ku e Rupert no a hunga temporada pasa i konsekuentemente el a bira liber. E akto di firmamentu a tuma lugá na e villa di e mènedjer Quincy Martina.

Kabuya a hunga ku Santa Rosa dia el a subi dòbel A, despues el a pasa pa e ekipo di Skòrpions i te ku dos aña pasa el a hunga pa e Piratanan di Santa Maria.

E firma di Rupert no tabata difísil pa e ekipo di Santa Rosa a hañ’é, mirando ku awor e famia ta kompletu. Rupert ta ruman di Rutherson Ustasia, primu di Kenrick Fraai, primu di Riordan Windster i Rowently Windster, miéntras ku Hershon Juliana ta sua di Kenrick Fraai, pues un famia kompletu e ekipo a sera den “AA”.

Segun dirigentenan di Santa Rosa La Familia, nan ta falta solamente Roderick ‘Mozzy’ Bernadina pa e famia ta kompleto i nan lo bai traha riba dje sigur pa otro aña.