Ajax a hunga bala i dominá pero Real Madrid ta logra viktoria

133
Fot ajax: Gol invalidá dje ekipo di Ajax ku por kambia tur aspekto dje partido. E kara dje kiper di Real, Thibaut Courtois, ta bisa tur kos.

 

 

 

 

AMSTERDAM,  – No nada malu si bo pensa ku tin biaha ku futbòl ta hopi inhustu den kaso si bo mira e partido di ayera entre Real Madrid i Ajax. 

 

E ekipo blanku dirigí pa e mister, Santiago Solari, a sali bibu for di Amsterdam despues ku simplemente e la keda aroya òf trapa den vários fase di wega,  pero finalmente den e poko oportunidat ku nan a risibí nan logra viktoria ku skor di 2-1 den Johan Cruyff Arena.

 

E viktoria aki práktikamente ta laganan ku pia den kuartfinal di  Champions League, ya ku e partido di buèlta ta bai tuma lugá den Santiago Bernabue ku no ta fásil pa un ekipo ekstranhero logra triunfo fásil.

 

Dos gol di Karim  Benzema i Marco Asensio tabata susifisiente pa logra e viktoria  riba e hóben e ekipo hulandes. E gol di Ajax a keda anotá Ziyech, porsierto ku niun momento den partido no a baha kabes pa Ajax i asta dominá ampliamente riba e ekipo blanku.

 

Aparte di dominá e partido e ekipo di Amsterdam no a konta ku yudansa ni di suerte, rèfri i tampoko e VAR, porsierto na unda den un polémiko desishon un gol a keda invalidá for dje ekipo di e coach,  Erik ten Hag.

 

Pa loke ta suerte tampoko Ajax no por a konta kuné ya ku nan dal un bala den palu di gol den promé mitar i den último minüt tempu di deskuento e delantero danes dje ekipo di Amterdam, Dolberg,  ta hañ’é su so ku Cortois, pero na ora di skòp e ta slep i kai.

 

Den partido di buèlta e ekipo di Ajax mester skor dos gol den Santiago Bernabue i sin permití gol kontra, pa asina nan pasá pa kuartfinal di Champions League di kual ta nada fásil.

 

Kosnan Importante dje Partido:

Ajax: Onana, Mazraoui, De Ligt, Blind, Tagliafico, De Jong, Van de Beek, Schöne (Dolberg, 72′), Ziyech, Tadic i Neres.

Real Madrid: Courtois, Carvajal, Nacho, Sergio Ramos, Reguilón, Modric, Casemiro, Kroos, Bale (Lucas Vázquez, 60′), Benzema (Asensio,72′) i Vinivicus (Mariano, 80′).

Golnan: 0-1, min.59. Benzema. 1-1, min. 74. Ziyech. 1-2, min. 87. Marco Asensio.

Rèfri: Damir Skomina (Slovakia). E la mustra karchi hel  Ziyech (52′), Reguilón (69′), Lucas Vázquez (83′) i Sergio Ramos (89′).

Insidensianan: Partido di ida bálido pa oktavo final  Champions League disputa den stadion Johan Cruyff Arena na Amsterdam. A warda un minüt di silensio na memoria di Emiliano Sala.