Kandela den hotèl di New Delhi ta laga saldo di 17 morto

83
Hotèl ku tabata na kandela den oranan di ayera mardugá.

NEW DELHI – Un kandela a arasá ku e hotèl ekonómiko di sentro di New Delhi den oranan di djamars mardugá i a laga saldo di 17 morto i otro kuater persona mas heridá, inkluyendo un muhé di Myanmar ku a hañ’e ta bula for di bentana di pisonan superior pa skapa di e kandela.

Entre esnan ku a sobrebibí e insidente aki tabata Sivanand Chand, un huéspet di 43 aña di edat, kende a lanta for di soño na alrededor di 4or di mardugá ku problemanan a por hala rosea.

Esaki a indiká na medionan di komunikashon ku ora el a habri porta di su kamber, el a tende vários gritu di yudansa den kambernan den serkania. E gang di e hotèl tabata yená ku huma i kompletamente sukú.

Den un video ku a keda grabá pa un trahadó di e hotèl a mustra kon e kandela a konsumí parti superior di e edifisio, unda segun outoridatnan tabatin un kushina improvisá no outorisá ku a keda konstruí.

Segun Chand, e operashon di reskatá a dura basta pa motibu ku e promé trùknan di bombero ku a yega tabatin trapinan manual ku no tabata sufisientemente haltu pa yega na tur piso.

E gran mayoria parti di esnan ku a pèrdè nan bida den e hotèl Arpit Palace di Karol Bagh, den un zona di India yen di tienda i hotèlnan ekonómiko i sumamente popular entre turistanan, a pèrdè nan bida asfiksiá.

E konstruktor di e hotèl tabatin un pèrmit di departamento di bomberonan pa lanta un di kuater piso, altura standart den sentro di e siudat. Pero esaki, segun tur kos ta indiká, tabatin seis piso.

Masoménos 100 bombero i 25 trùk mester a partisipá den e labornan di ekstinshon di e kandela, kua a afektá henter e edifisionan ménos e piso mas abou.