E manager Solskjaer lo invitá Tahith Chong pa e partido di djaluna próksimo kontra di Chelsea

102
Fot tahith: 'Angel Gomez (L) i Tahith Chong a train práktikamente hinter siman aki ku ekipo prinsipal dje ekipo di Manchester United. Segun tur kos ta indiká e hóbennan aki lo keda invitá djaluna awor pa mira akshon kontra di Chelsea.

MANCHESTER ,  – E chèns ta hopi grandi ku  Tahith Chong djaluna próksimo lo ta presente den selekshon di hungadónan di Manchester United, pa loke ta e partido di Kopa di Inglatera kontra di Chelsea.

E manager,  Ole Gunnar Solskjaer, lo por uza e talento kurasoleño hopi bon, sigur si mira ku e hungadónan manera Anthony Martial i Jesse Lingard ta leshoná.

Martial i Lingard a leshoná djamars último den partido na kas bálido pa Champions League kontra di Paris Saint-Germain (0-2), miéntras segun tur kos ta indiká ámbos lo bai keda tres siman for di akshon.

E posibilidat aki ta habri porta pa delanteronan ku no ta mirando hopi akshon e temporada aki den ekipo di United, manera  Chong. E eks hungadó di Feyenoord  temporada aki ya a hunga 30 minüt den partido FA Cup kontra di Reading (2-0).

Posiblemente e hóben di djesnuebe aña di Kòrsou djaluna lo bai haña minütnan pa e hunga den e Kopa dje torneo ingles.

“Anthony i Jesse a hunga bon pa nos den e último periodo aki ”, asina  Solskjaer a duna di konosé den konferensiá djabièrnè.

“ Ku nan kualidatnan i velosidat nan ta hopi importante pa nos, prinsipalmente den atake. Pero Romelu Lukaku  i Alexis Sánchez tambe tin otro kualidatnan i por demostrá awor kiko nan tambe por hasi.  E leshonnan di  Anthony i Jesse ta habri oportunidat pa Romelu, Alexis, Chong i Angel Gomes.’

“ Nos tin algun posibilidat den nos formashon di atake”, asina Solskjaer a duna di konosé. ‘Angel i Chong a train hinter siman ku nos, dus e chèns ta grandi ku djaluna nan lo ta den e hungadónan invitá.  Nos mester bai forma nos mihó ekipo pa e partido kontra di  Chelsea”.

E derota kontra di PSG  tabata e promé di e manager Solskjaer for di despues ku e la tuma mando ku United.

“ Na kabes dje ekipo aki bo mester reakshoná mesora”, asina  manager norwego a duna di konosé. “ Tur dia bo ta topa kosnan nobo den e trabou aki, miéntras ku un partido di bishitante kontra di Chelsea ta un duelo duru sigur. Den e dos dianan siguiente aki nos mester bai train hopi bon pa asina ta kla pa djaluna pa e kompromiso”, asina e manager di Man U a terminá bisando.