Sospechoso envolví den kaso di maltrato despues di aksidente arestá

403
Willemstad—Djamars 19 di febrüari 2019, alrededor di 18.29 or, Sentral di Polis a risibí notifikashon di un kaso di maltrato ku a tuma lugá na Olindaweg.

E patruya ku a yega na e sitio a haña un hòmber drumí riba kaminda ku herida na e parti ariba di su kurpa. For di un investigashon ku polis a hasi a resultá ku riba Snipweg probablemente shofùr di un pikòp a dal den spil di un trèker ku tabata koriendo riba kaminda i sigui kore. Shofùr di e trèker a pita shofùr di e pikòp pa e para, pero e no a duna oido i a sigui kore i akinan a kuminsá ku un persiguishon. Riba Olindaweg shofùr di e pikòp a aksidentá i na momentu ku e la baha for di su vehíkulo e la wordu maltratá dor di shofùr di e trèker. Ambulans ku a presentá na e sitio a transportá e víktima pa poliklínika di SEHOS pa tratamentu médiko. Despues di e akto di maltrato e hòmber sospechoso a kore bai for di e sitio. Polis ku tabata den e área a kuminsá ku un persiguishon tras di e sospechoso. Riba Kaya Andruw Jones a para e vehíkulo i a detené e hòmber C.P.J.G.W. nasé na Kòrsou, relashoná ku e maltrato ariba menshoná.

A presentá e sospechoso dilanti di un Fiskal Ouksiliar, ku a ordená su enkarselamentu pendiente di mas investigashon.