“Bo mester ta fet i den forma”

114
Miembronan di nos selekshon futbòl.
WILLEMSTAD—“Bo mester ta fet i den forma. No ta asina ku ta durante di e siman di wega, lo bo kier bai kai den forma, sino for di na momentu ku bo wòrdu selektá, bo mester ta kla.

Ta esei ta e motibu ku mi ta move hopi i sigui tur e diferente hungadónan su paso i keda den kontakto ku nan”, tékniko Remko Bicentini a duna di konosé.

Esaki referiendo na futbolistanan miembro di nos selekshon nashonal. Un ke otro ku bista riba nos próksimo kompromiso, ku lo ta otro luna na Antigua.

Kòrsou lo enfrentá Antigua, komo bishitante riba djasabra dia 23 mart 2019, pa loke ta e último wega di e buèlta inisial di Nations League pa loke ta Concacaf.

Nos selekshon nashonal lo biaha for di Oropa, saliendo Schiphol djamars dia 19 mart benidero, direkshon Antigua. Ta e intenshon pa praktiká na Antigua di djarason 20 te ku djabièrnè 22 mart, pa asina ta debidamente prepará pa e partido ku lo hunga djasabra dia 23 mart 2019.