“Mi ta disfrutando mas ku nunka di kampionato”

169
Rowendy Sumter.
WILLEMSTAD—Deporte Vigilante ayera a hiba un kombersashon kòrtiku ku kiper di e ekipo di Scherpenheuvel, kende alabes ta kiper di nos selekshon nashonal di futbòl, Rowendy Sumter.

Esaki pa asina kompartí ku nos fiel lektornan, kon e kiper aki, ta mira desaroyo di e aktual kampionato di futbòl FFK, pa loke ta promé divishon su temporada 2018/2019.

Rowendy a kontesta di e siguiente manera, riba preguntanan risibí:

“Kampionato ta kanando tremendo tantu na nivel di ekipo, komo na nivel personal. Mi ta disfrutando mas ku nunka di e kampionato.

Mi ekipo ta invikto i ta kanando pa dilanti i tambe na nivel personal mi ta dunando lo máksimo di mi parti i tin basta wega sin haña gol kontra, kual pa kualke portero lo ta algu ku ta hasi bo sumamente orguyoso di bo mes.

Ami ta gradisí mi ekipo i nos kuerpo tékniko, ku sigur ta respaldá mi den esaki i tambe mérito ta bai na mi entrenadó personal di portero, kende ta Raymar Revierre.

Ta bai bon ku e ekipo. Si bo puntra mi ku mi a spera esaki, lo mi bisa bo no. Pero den mesun rosea mi ta bisa bo ku Skèrpènè ta traha duru tur dia i ta train basta konsistente pa mantené nos resultadonan.

Mi no por bisa kon leu nos lo yega, paso no ta den mi so su man, pero si mi por bisa bo unda nos ke yega, kual ta e kaminda ku tur tim lo kier yega, for di ora kampionato kuminsá.

Nos ta kana nos trayekto den fase i ta stap pa stap ta hasi kada meta fuerte, pa logra e meta final.

Na spañó nan ta bisa “La tercera es la vencida”, kier men ta den e trayekto ei Skèrpènè ta kanando.

Ekiponan pa tene kuenta kuné ta hopi, paso pa ami Jong Holland lo bin mira su gloria bèk den playoff, paso nan tin un tremendo ekipo pero ta detayenan ta hungando den nan kontra.

Dominguitu ta keda Dominguitu i tur hende por mira ku nan ta  firme na di dos lugá kontra tur pronóstiko.

Mi ke añadí ku Centro Barber, komo un ekipo ‘fighter’, lo por batayá i bira un kabai ferfelu ku e grupo hóben ku nan a mantené huntu.

Kier men kampionato lo sigui interesante i Skèrpènè lo sigui traha duru pa logra bon resultado i sali for di e porta grandi, Fanatikonan sigui yega skèrpi asina na vèlt, i apoyá boso ekipo paso ta awor kos tei pasa.

Nada no a pasa ainda. Tur kos tin ku pasa ainda. Nos ta bai drenta e buèltanan interesante, kual tin ekipo ku ta krese i otro ta tambaliá. Tambe tin ekipo ku ta bandoná kareda.

Pues ta “Ban pa bai”, stail di e tumba di Ray…”.