Ralph Winedt ta regresá logrando titulo máksimo

99
Momentu di premiashon.
WILLEMSTAD—Djarason último tabata fecha pa e kompetensia B-klas, den e sala di tènis di mesa den bario di Muizenberg, unda tabatin 29 hungadó den akshon. A kuminsá promé ku e weganan di grupo pa klasifikashon, pa despues sigui ku e kuart, semi i e partido final di e kompetensia.

Federashon Tènis di Mesa Kòrsou por mira atras, riba un tremendo torneo ku a wòrdu ofresé pa tantu e hungadónan, komo e bon públiko ku a presentá un biaha mas.

Último torneonan ta hala bon públiko. Esaki a keda patrosiná pa RAPIDTRONIC.

E weganan di klasifikashon no a konosé sorpresa, komo tur e hungadónan ku tabata den tapara pa sigui, a kumpli tambe ku esaki. Tabata un meskla di hungadó, den sentido ku tabatin kabayero (9) , dama (7) i algun di hubenil (3).

Den e kuartfinal tabatin e weganan, unda Mary-Ann Mac Leod ta gana di Edith Mac Leod 3-1. Tabata un partido kaminda mama a duna yu hopi doló di kabes. Edith a mustra ku ainda e tei, ounke ku edat a hasi diferensia.

Dik Hendriks, kampeon di e último torneo di B-klas ta gana fásilmente di Lalo Arvelo 3-0.

Giovanny Silonero e biaha aki si ta gana di Fawzy Ayubi 3-0.

Komo último di e kuartfinal, e hóben hungadó di 17 aña, Ralph Winedt, a hasi regreso den arena di pinpòn i ta gana den un wega hopi bon bringá, di Cai Walters, ku skor di 3-2.

Seguidamente tabatin e partidonan semifinal, unda Dik Hendriks ta sigui ku su racha viktorioso, ganando di Giovanny Silonero 3-1.

Den e otro partido Ralph Windedt den un bon wega ta gana di e supkampeon di B-klas di aña pasá, Mary-Ann Mac Leod 3-1.

E partido final entre Dik Hendriks i e hoben Ralph Winedt a bira un berdadero drama. Ralph Winedt i Dik a fahá ku otro kaminda finalmente Ralph ta gana realmente pèrtá, ku skor di 3-2. Esaki ku parsialnan di 10-12, 11-1, 10-12, 11-9 i 13-11. Tabata un torneo unda e públiko a keda den su total kasi te na final di e torneo.