Segun MCB bankonan ta eksihí pa mantené nan reputashon

212
Sali: momento abogadonan Van Hees i van den Heuvel, (ámbos na bachi) a sali korte ayera kompañá pa funshonarionan den departamento legal di MCB.
Punda—Ayera abogadonan van Hees i van den Heuvel a splika korte ku MCB Bank tin di mantené un bon reputashon. Esaki den kuadro di eksigensha nan imponé pa bankonan korespondiente internashonal. Pa tal motibu entrante 31 di mart próksimo nan a súplika Dos Santos pa bai buska un otro banko.

Van Hees kende a hiba mayoria parti di e defensa pa MCB a splika ku ta un kestion di evaluashon di interes. Di un banda nan tin un kliente di otro banda nan mester protehá interes general den kuadro di mantenshon di nan kumplimentu ku reglanan imponé pa Banko Sentral pero tambe bankonan internashonal.  Dor di mantené un nivel di kumplimentu nan ta tene nan reputashon, van Hees a splika ayera na wes mr. Pieter de Kort. Den kuadro di kumplimentu, bankonan mester investigá reputashon di nan klientenan, esaki pa determiná di tin aktividatnan sospechoso. Segun van Hees e konfiansa di públiko en general mester keda pa banko. Esaki ta enserá ku klientenan manera Robbie Dos Santos i klientenan den wega di number ta kai den un kategoria di riesgo. I MCB, segun artíkulo 37 di nan kondishonnan, por finalisá un relashon i sera kuenta si akaso e kliente no a kumpli ku nan eksigenshanan.

E abogado a bai bek den buki di Dos Santos. El a bisa ku Dos Santos a wòrdu kondená den pasado pa labamentu di plaka, falsifikashon i desvio di impuesto pa un total di 70 mion dòler estado unidense. Segun van Hees, den e veredikto di wes a keda konkluí ku Dos Santos a uza kuentanan di banko na MCB i WIB entre 2008 pa 2013 pa logra lokual e la wòrdu kondena p’e. Mas aleu segun van Hees, Dos Santos tabata envolví tambe den e kaso di labamentu di plaka di famia Greinstein. Riba e punto aki, abogado mr Bertie Braam durante su kontesta den dupliká a splika wes esaki no ta bèrdat. A skucha Dos Santos komo testigu. De fakto, durante interogashon a bin sali afó e famia a uza mashin nan di swaip di prinsipalmente MCB pa laba miónes di dollar.  Pa lokual ta trata e empleadonan di Dos Santos, e abogado a bisa ku un grupo a bishitá e banko pa duna splikashon. E banko por komprondé nan situashon pero e relashon entre e empleado nan i kousa di e desishon pa sera e kuenta no tin relashon ku otro, segun Van Hees.