Giselle Mc William: Mester aselerá e proseso pa yega na un maneho integral pa nos grandinan

85
Parlamentario Giselle Mc William a pone atenshon na kasnan di grandi ku ta oumentando dia pa dia i ku malesanan króniko serka nos grandinan tambe ta oumentando.
Willemstad,– Parlamentario Giselle Mc William resientemente a trese dilanti den reunion públiko ku frakshon di MAN ta preokupá pa ku e situashon rondó di kas di grandinan, mirando ku e enbehesimentu di grandinan ta kresiendo tantu na Kòrsou komo otro paisnan na mundu.

Tambe Giselle a pone atenshon na kasnan di grandi ku ta oumentando dia pa dia i ku malesanan króniko serka nos grandinan tambe ta oumentando. E parti di kontròl riba kuido i den kasnan di grandi tabata un di e puntonan mas importante ku frakshon di MAN a trese dilanti di kual mester pone mas atenshon na dje

Na final frakshon di MAN a presentá un moshon ku a karga sosten di demas parlamentarionan di tantu oposishon (MFK,PS) ku tabata presente durante e reunion aki i koalishon kompleto:

Den e moshon a urgí gobièrnu pa:

  • Aselerá e proseso pa yega na un maneho integral pa grandinan
    • Kontinuá ku kontròlnan di kasnan di hende grandi pa salbaguardiá kalidat di kuido na nos grandinan
    • Pa aselerá e proyekto piloto pa yega na un ofisina di konsulta pa grandinan
    • Pa bini ku un maneho pa duna grandinan posibilidat pa partisipá den desaroyo teknológiko
    • Pa enkaminá e proseso pa atendé ku e diferente leinan ku ta konserní kasnan di hende grandi i asina definí kontròl, maneho i ehekushon entre e ministernan konserní

Segun parlamentario pa partido MAN, señora Giselle Mc William su frakshon ta para pa dignidat humano ku ta un di nos pilarnan di ideologia di partido MAN i p’esei ta sumamente importante pa nos sòru pa nos grandinan ku a yuda konstruí e pais aki.