Empate sin gol pa ekipo di Jetro Willems

44
Jetro Willems.
ALEMANIA—Tereno di bala den stadion Commerzbank Arena na Alemania, ayera tabata sitio pa e wega bálido pa Europa League, entre e ekipo di kas, Eintracht Frankfurt i e ekipo di Inter.

Esaki a finalisá sin anotashon, despues di un lucha tenas, unda ámbos ekipo a trata na yega na anotashon pa asina bai ku e triunfo i 3 puntonan.

E ekipo italiano, ku ta hunga den Serie A, Inter, tabatin un gran oportunidat pa logra esaki, pero ta desperdisiá un tiru penal, ku nan a haña na di 22 minüt di e parti inisial di partido.

E ekipo aleman, Eintracht Frankfurt, ku ta hunga den Bundesliga na Alemania, a inisiá partido ku e futbolista Yu di Kòrsou, Jetro Willems, na banki komo suplente. Tabata na di 77 minüt di partido, ku e ta drenta supstitiendo su kompañero di ekipo Sebastian Rode, pa asina hunga durante di e último 13 minütnan di wega, unda mester a konformá ku e empate sin gol.