Mourinho ta pone un kondishon pa bisa “ SI” na Florentino Pérez

70
Fot mourinho: José Mourinho (R) a pone kondishon pa tuma rienda dje ekipo di Real Madrid ora ku Santiago Solari keda destitiu. Sergio Ramos ta unu sigur ku e no ke segun informe.
 

MADRID,  – E mister portugues,  José Mourinho, a pone kondishon pa tuma rienda dje ekipo di  Real Madrid ora ku  Santiago Solari keda destitiu.

Segun a keda informá ayera pa medionan di digital “Mourinho” a laga kla i raspa kiko ta su kondishon pa e firma un kontrakt ku ekipo  madridista, di kua ta deshasí di kuater  peso pisa dje plantel.

Lo bo no kere pero e kuater hungadónan ku Mourinho ta eksigí pa bai pa e bini ta e sentral i kapitan Sergio Ramos, e linkshaf Marcelo i delanteronan Karim Benzema i Gareth Bale.

Ningun di e kuaternan aki lo no kontinuá na  Santiago Bernabéu for di 30 di yüni próksimo den kaso   Mourinho regresá e kas blanku. Miéntras  segun informashon e presidente madridista , Florentino Pérez,  ta dispuesto di akseptá e eksigensianan dje mister portugues tambe.

Florentino Pérez  ta hopi pero hopi desesperá pa haña un eskudo protektor kontra di e fanatikonan  madridista, porsierto ku ta responsabilise  direktamente  pa e frakaso dje plantel prinsipal blanku na serada di e temporada, manera di keda eliminá for di Copa Rey, Champions League, i keda sin chèns pa logra e titulo den La Liga despues di pèrdè kontra di FC Barcelona den Santiago Bernabéu.

Segun tur kos ta indiká ta  Mourinho  ta e úniko  alternativa, despues ku e franses, Zinedine Zidane, a duna di konosé ku e no ta dispuesto di asumí e posishon awor aki di un manera inmediato.

E tékniko portugues te ku siman pasá tabata ful metí den un faseta di komentá partidonan, i asta no tabatin riparo despues dje “clásico”, pa pone riba un pedestal e ekipo ku tabata su rival den su etapa komo mister na Spaña di Real Madrid.

Tabata despues di aki ku Mourinho a bandoná e ekipo blanku i pasá pa dirigí e ekipo Manchester United, pero a pèrdè trabou despues di ehersé un desempeño ku a laga basta di deseá.

Di otro banda siman pasá e programa ‘Jugones’ a sigurá ku Real Madrid lo a pidi e mister franses pa regresá riba banki dje ekipo blanku den e próksimo oranan.

No opstante i aunke Zidane a mustra ku e por ta partidario pa regresá bek pa entrená  Real Madrid, tòg segun ‘Jugones’ parse ku e franses no tin intenshon di kibra su aktual bida di plaser ku su famia i lo por tuma e enkargo dje  ekipo final di temporada (yüni).

Di e forma aki e informashon proporshoná pa e programa  “La Sexta” ta unu veras i konkreto, esta ku ekipo blanku lo terminá e temporada aktual ku Solari na kabes.

Florentino lo a intentá di trese ku karakter di urgensia e mister franses, Zinedine Zidane, pa asina kibra e krísis aktual dje ekipo i inyektá di tantu fanatikononan komo den plantel mes. Aparte dje kosnan promé menshoná tambe di konstruí un ekipo pa otro temporada.