Mas aresto den kaso di maltrato brutal na Wiriweg

Víktima ketu bai ta interná

3294
Willemstad—Ya reshèrshinan ku tin e investigashon di e maltrato brutal ku a sosodé den e kura di kas na Wiriweg a logra di realisá dos detenshon ku ta trata di un muhé i un hòmber.

Ayera reshèrshinan a logra di realisá e di dos aresto den e kaso di maltrato brutal ku a tuma lugá den e kura di kas na Wiriweg.  Ta trata di e kaso di maltrato ku arma ku a tuma lugá dia  2 di februari último unda un hòmber a keda maltratá formalmente ku un pata di kabra.  Ya den e kaso aki a logra di arestá e dama ku ta forma bida ku e víktima i ayera a realisá detenshon di un hòmber komo kómplise di esaki. Ta trata di e kaso unda a pidi asistensia di Polis i tambe ambulans den un kura di kas na Wiriweg pa un hòmber na suela ku tabata den un plas di sanger despues di a keda maltratá.

E víktima ku a keda maltratá tabata trahando ora ku e la pasa kas.  E víktima tabata den un pikòp di trabou huntu ku un kolega. Ora ku nan a yega na e adrès e víktima a baha bai paden pa despues a surgi un forsageo.  Tabata e ora ei ku a kuminsá batié ku pata di kabra den kabes. E kolega ku tabata den e pikòp mirando kiko tabata pasando a baha for di e pikòp i a  kore bai for di e sitio. Na momento ku polisnan a presentá a splika Polis ku e  víktima ku tabata for di su konosementu mester a wòrdu maltratá pa un grupo ku e debe. A bai Poli ku e víktima na unda mesora e la wòrdu interná den kuido intensivo. reshèrshinan ku a keda enkargá ku e investigashon  a kuminsá interogá algun testigu unda a bin saka afó ku e partner di e víktima sa mas di loke a pasa.  A bin saka afo ku e víktima na momento ku e la kore yega kas di sorpresa a bin topa su partner den kompania di un otro persona. Einan a surgi un bringamentu entre di e víktima i e hòmber ku e la bin topa den su kas. Na e momento ei e la wòrdu maltratá ku pata di kabra den kabes. Tabata siman pasa  ku a hasi detenshon di e dama i ayera a logra di realisá aresto di un hòmber komo kómplise den e kaso aki. Te ku awor tin dos detenshon den e kaso i no ta ekskluí mas aresto.