Guaidó ta konvoká manifestashon pa awe debí na pèrdida di koriente

57
Guaidó a konvoká un marcha rònt e pais pa awe tardi.

CARACAS – E kabesante di Parlamento di Venezuela, Juan Guaidó, kende a outo proklamá su mes presidente interino di e pais na luna di yanüari último, a konvoká un manifestashon pa awe ront e pais pa asina rechasá e pèrdida di koriente ku a afektá kasi rònt e teritorio venezolano.

Guaidó a indiká ku awe, den oranan di 3or di atardi e ta konvoká henter e pais pa subi tur kayanan pa asina ekspresá nan rechaso. Esaki el a indiká durante un debate na e Parlamento.

E lider opositor di e venezolanonan a pidi esaki nan pa pone nan mes di akuerdo pa eksigí rèspèt pa ku nan derechinan, pues esaki ta responsabilisá e gobernante Nicolas Maduro di e pèrdida di koriente ku ta mantené gran parti di e pais ainda den sukú.

Segun esaki a indiká, e fayo eléktriko a keda presentá pa mal gestashon di outoridatnan di energia i pa falta di invershon den e sistema.

Pero e gobièrnu di Maduro ta sigurá di nan banda, ku loke ku a sosodé ta un sabotahe na e prinsipal empresa di koriente di e pais, el Guri, aunke no duna detaye di esaki.

Debí na e pèrdida di koriente aki mes, orarionan di trabou i tambe di skol a keda kanselá den oranan di djabièrnè último i tambe den oranan di ayera, pues e komunikashonnan, transporte i suministro di awa a keda severamente afektá.

Ademas, kuminda di hopi famia venezolano ku tabata keda mantené den frishidèr a daña i outoridatnan ya a informá di morto di 21 persona debí na e fayo aki.

Venezuela ta un pais ku e mayor reserva di petrolio rònt mundu, pero e ta biba den un krísis ekonómiko i sosial serio, kua a okashoná entre otro fayo den servisionan públiko, inkluyendo koriente.

Ya pa vários aña kaba, e pais karibense ta registrá fayonan eléktriko na diferente regionnan di e pais, pero loke ku a sosodé den oranan di djaweps tras di lomba, tabata esun mas serio di tur tempu.