24 aña kastigu pa asesinatonan kruel

125
sirio ta haña kastigu plus mester paga 156.000 na daño
MAASTRICHT—E sirio ku den estado sikotiko a hinka 4 persona den desèmber 2017 a keda kondená na 24 aña kastigu i tratamentu obligatorio.

Asina korte di Maastricht a determiná ayera. Dos di e víktimanan a bin fayesé. Osama I. (38) di Raqqa a deklará ku el a tende demoñonan papia kune (djinns). Su motibu nunka tabata kla. Hues a yama su aktonan kriminal kruel. Prome el a hinka un hòmber di 46 aña, 15 minüt despues un dama di 56. Tambe el a hinka e dama su yu muhé di 21 aña den kara i kurpa. Un bisiña a skapa e damita dor di dal e sospechoso ku un waya. Ministerio Públiko a pidi 18 aña anteriormente ku tratamentu obligatorio. Pero korte ta tuma e sospechoso na malu ku e no ta tene kuenta ku e sufrimentu ku el a okashoná i a yega na un kastigu mas haltu. Pieter Baan Centrum a konseha korte pa deklará e hòmber no responsabel pa e aktonan. Pero korte a rechasá esaki pasobra Osama mes ta kulpabel pa su estado sikotiko dor di uso di kanabis i otro píldoranan. Den e kastigu a inkluí tambe akusashonnan di maltrato ku e tabata responsabel p’e anteriormente. Korte a otorgá daño perhuisio na 13 hende pa e sufrimentu ku Osama a okashoná. E suma total di kompensashonnan ta 156.000 euro.