Charles Alberto temporalmente Roadmanager di IBG

145
E tin e agènda di ICONS BY GIO temporalmente.

WILLEMSTAD,—-Ketu bai mas informashon ta drenta na mesa di redakshon di ‘E Mulina’, rondó di agrupashon musikal ICONS BY GIO. Nos a keda pone na altura ku Charles Alberto ta e Roadmanager di agrupashon musikal I.B.G. ku ta para pa ICONS BY GIO.

Nos tin informashon ku tur loke ku tabata kai bou di Lim Rosinda awor ta kai temporalmente bou di maneho di Charles Alberto, no ta un sekreto ku Lim Rosinda i Charles Alberto den pasado a yega di traha huntu den diferente proyekto musikal kaminda ku e popular kantante kompositor Hunneley Felicia tabata aden.

Esaki ta nifiká ku Charles ta bon na altura di kiko ta kome i bebe di e trabou komo Roadmanager di kualke banda. ‘E Mulina’, di tur forma a purba na drenta den kontakto ku Charles tantu riba su telefon pa loke ta trata yamada, pero tambe riba e sistema di App i riba su Facebook, pero sin resultado deseá.

‘E Mulina’, ta na altura ku e dia nan aki ta masha poko ta e artista nan i tambe doño nan di banda ta bai kue nos telefon, prinsipalmente esun nan ku ta den moveshon. Paso nan ke evitá ku nos ta yega na informashon rondó di nan agrupashon musikal. Pero loke ku nan ta lubidá ku nos ta bida 24 ora pa dia den mundu di farándula, esaki ta hasi hopi difísil pa nan skonde informashon pa ‘E Mulina’. Nos fuente a sigurá nos ku 100% Charles Alberto tin tur e tarea nan di Lim Rosinda den su poder temporalmente den agrupashon musikal INCONS BY GIO.