GENTZ ta bai haña un oferta ku e no por ninga

332
Tin un oferta riba mesa di parti di un grupo di Karnaval den nan direkshon.

WILLEMSTAD,—-Awe ta nèt ocho dia ku e temporada di Karnaval a yega na su final. Pero mes ora tin algun doño nan di grupo di Karnaval ku ya a kuminsá habri negoshashon nan, ku diferente agrupashon musikal.

‘E Mulina’, a haña informashon ku na e momentu tin un doño di un grupo di Karnaval ku tin un plan grandi riba mesa, kaminda ku nan ta bai pone un oferta deskomunal riba mesa ku gerente di agrupashon musikal GENTZ TRE’CHIC no por ninga. Nos tin informashon ku e suma ta un suma ku ta bai bira esun di mas haltu den historia di temporada di Karnaval.

Nos a drenta den kontakto ku gerente di GENTZ TRE’CHIC pero nos no a hañ’é na telefon, tambe nos a drenta den kontakto ku Roadmanager di e banda ku ta Cesar Rodriquez, e tampoko nos no a logra di haña na telefon, ‘E Mulina’, no sa ku ámbos ta na Kòrsou si òf no.

Loke si ku ‘E Mulina’, por bisa ku di kaminda ku nos a haña e informashon aki, nos por hinka nos man nan den kandela pe, paso ta un persona ku ta hopi pero hopi serka di ámbos organisashon tantu di e banda i di e grupo di Karnaval. Nos ta bai sigui vigilá e moveshon aki ku wowo nan di falki.