Maduro ta detené periodista i ta kulpa esaki di pèrdida di koriente

109
Hòmber venezolano ku nashonalidat spañó kua a keda detené.

CARACAS – E Sosiedat Interamerikano di Prensa a kondená e detenshon di e periodista venezolano ku nashonalidat spañó, Luis Carlos Diaz pa un funshonario di e servisio di inteligensia di gobièrnu di Nicolas Maduro.

E Sosiedat, ku sede na Miami, a kalifiká kaptura di Diaz, ku ta permanesé inkomuniká, komo un atake kontra libertat di prensa na Venezuela.

Diaz, kende tin nashonalidat venezolano i spañó, ta traha na e emisora Union Radio Noticias di Caracas i ta aktivista di derechinan humano.

E periodista a keda detené den e atardi di djaluna último pa agentenan di e Servisio Bolivariano di Inteligensia i segun su kasá a denunsiá, Naky Soto, tambe e periodista, den oranan di ayera mardugá outoridatnan a drenta nan bibienda i poderá di kuater telefòn selular, tres Lèptòp i un harddisk.

E periodista a keda señalá pa e dirigente ofisialista Diosdado Cabello, konsiderá number dos di chavismo, pa motibu ku e ta supuestamente tras di e sabotahe di e sistema eléktriko, kua tin e pais den sukú for di oranan di djaweps pasá. Esaki ta un akusashon ku Soto mes a tacha komo un lokura.

E presidente di e Asosiashon ariba menshoná, identifiká komo Maria Elvira Dominguez i presidente di e Komishon di Libertat pa Prensa i Informashon, Robert Rock, a eksigí esaki su liberashon inmediato.

Dominguez a pidi gobièrnu venezolano pa kumpli ku obligashonnan internashonal referente na trato i protekshon di periodistanan i medionan di komunikashon.

E régimen di Maduro a detené di forma temporal, diferente periodistanan venezolano, koresponsalnan ekstranhero i esnan mandá spesial, entre nan periodista strea di e kadena di Univision, Jorge Ramos.