WILLEMSTAD,— Ayera e hòmber Curtley Basilia mester a presentá pa pro forma di su kaso, unda ta sospech’é di ta esun ku a aserká e eks polis X. de W. pa buska informashon, pa sa riba kua buelo e víktima ta yega Kòrsou..

Ta trata aki di e kaso yamá Hato Shooting unda 2 persona a pèrdè nan bida, despues ku algun hòmber a yega na aeropuerto Hato, unda a los basta tiru ku arma pisá. Basilia kende ta konta ku abogado mr. Vaders mester a presentá ayera despues ku el a keda detené 28  di desèmber aña pasá na Hulanda, na momentu ku e tabata pará kantu di kaminda.

Ya pa algun tempu kaba polis tabata vigilá e sospechoso unda a disidí di detené riba e fecha menshoná. Den e kaso aki e sospechoso mester a aserká e polis ku tabatin òrdu pa bai buska un informashon, pa wak riba kua buelo ‘Djais’ Juliana ta bin Kòrsou, unda a manda algun sikario pa bai kita bida di e víktima, miéntras su primu ‘Champi’ Arnhem tambe a pèrdè su bida na momentu ku el a bai busk’é for di Hato.

Ministerio Públiko a opta pa pone un pro forma di e kaso mirando ku e sospechoso su 60 dia nan di detenshon a pasa, unda tòg a logra alargá e detenshon ku 30 dia mas un dia promé ku e pro forma, esta ántayera. Pa e motibu aki a hala e dagfar aden mirando ku ya nan a logra nan meta pa alargá detenshon di e sospechoso.

E sospechoso kende mester a presentá ayera no a presentá unda a notifiká Tim di Aresto ku no mester presentá ku Basilia mas na korte, mirando ku a hala e dagfar aden. E eks polis X. de W. lo keda skuchá komo testigu den luna di aprel mirando ku su deklarashon  ta importante pa e tratamentu di e kaso.