Nòmber di Palo i Chebe tambe ta riba e lista

146
Su nòmber ta paresé riba e famoso lista.

WILLEMSTAD,—-E dia nan aki farándula di Kòrsou ta ketu bai den notisia. Ayera nos a haña informashon ku nòmber di Raeve “Palo” Rog i di Seebert “Chebe” Leito ta riba un lista pa pasa forma parti di un agrupashon musikal.

Kurioso ta ku tur e dos músiko nan aki a entrega karta di retiro na nan agrupashon musikal ku nan tabata forma parti di dje. “Palo” tabata forma parti di Dolce Banda i “Chebe” tabata forma parti di Orkesta Vega i awor ámbos su nòmber ta paresé riba e famoso lista.

Mester bisa ku e dos músiko nan aki ta super talentoso, i esaki tur doño di banda na Kòrsou ta na altura di dje. Ta trata aki di dos músiko ku ta pas fásil den kualke agrupashon musikal, i mas ainda ora ta papia di Ritmo Kombiná, paso e dos músiko nan aki Ritmo Kombiná ta kore den nan sanger.

Den un entrevista ku tantu Raeve “Palo” Rog i Seebert “Chebe” Leito algun dia tras di lomba, ámbos a bisa ‘E Mulina’, ku nan ta wanta un ratu ku farándula, pero diripiente nos a mira nan nòmber riba e lista i ku nan ta bai keda aserka pa forma parti di un agrupashon musikal. Un kos so ‘E Mulina’, por bisa den e kaso aki, i esaki ta “Tempu ta e mihó maestro”.