“Pre-kampionato di ‘Champions League’ di Karibe”

498
E trikolornan di Jong Holland, kampion di Kòrsou, ku nan trofeo
WILLEMSTAD—Durante di e periodo di 5 te ku 15 aprel benidero, lo tuma lugá na Kòrsou un torneo internashonal di futbòl, ku partisipashon di 13 ekipo kampion di e islanan den Karibe. Lo bai ta e kompetensia ku lo hunga bou di nòmber “Concacaf Caribbean Club Shield 2019”, unda e kampionnan di Kòrsou, e trikolornan di Jong Holland, lo ta representando nos isla. Ta trata di organisashon, ku e aña aki, lo ta selebrando nan di 100 aña di eksistensia.
Dirigente trikolor Stanley Gonet huntu ku su tékniko Lennox Mauris.

Stanley Gonet
Relashoná ku e Pre-kampionato di ‘Champions League di Karibe’ aki, nos a kòmbersá ampliamente ayera ku un di e motornan tras di e ekipo lokal, kende ta Stanley Gonet, trahadó inkansabel di e organisashon, unda a haña diferente informashon pa kompartí ku abo komo fiel lektor, pa loke ta e grandioso evento deportivo aki.

“Local Organizing Committee”
E komishon organisadó di e evento, “Local Organizing Committee” (LOC) ta konsistí di 7 miembro, di kual 4 ta miembronan di direktiva di FFK i 3 miembro di e ekipo di Jong Holland. Ta trata di komishon ku ta presidí pa Stanley Coffie, miembro di direktiva di FFK. E torneo mes, ta bou di ouspisio di Concacaf. LOC a keda formalisá for di na luna di desèmber 2018, unda nan ta operashonal i trahando riba tur e diferente fasetanan di e organisashon i evento.

E torneo
E formato di e torneo ta di 3 pul di 3 ekipo i 1 pul di 4 ekipo, pa totalisá 13 ekipo, unda Jong Holland ta enkabesá e grupo di 4 ekipo, ku ta grupo A. Di kada pul 2 ekipo lo klasifiká pa siguiente buèlta, unda seguidamente lo saka e siguiente 4 ekiponan pa semifinal i e finalistanan. E torneo lo inisiá djabièrnè dia 5, unda lo bai tin wega, kada dia pasa, pa totalisá 6 dia di partido. E promé 4 dianan lo tin wega inisiando for di 3’or atardi, miéntras ku e di 5 fecha lo tin weganan semifinal mitar di 6 atardi i 8’or anochi, miéntras ku e gran final lo ta riba dia 15 aprel pa 8’or anochi. Jong Holland lo hunga su promé weganan den pul, riba dianan 5, 7 i 9 di aprel próksimo, pa 8’or di anochi den Stadion Ergilio Hato.

Yegada i hospedahe
E ekiponan i miembronan di arbitrahe, lo kuminsá yega Kòrsou, dia 3 aprel benidero. Miéntras ku for di 2 siman promé ku inisio di e torneo, e delegashon di funshonarionan di Concacaf lo yega pa inisiá ku inspekshon i kontrolá tur lokual ta trata organisashon di e torneo.

Ekipo trikolor, ku a inisiá den e gran final, temporada tras di lomba

Hospedahe i akomodashon:
E diferente ekiponan lo hospedá den tres diferente akomodashon riba nos isla. Ta trata aki di Hotèl Hilton, Acoya i Sunscape Resort, miéntras ku miembronan di arbitrahe pa e torneo lo hospedá na Renaissance Hotèl. Tur delegashon lo risibí ‘full’ akomodashon, manera entre otro desayuno, almuerso, sena, gym, transporte, fasilidat pa entrenamentu, fasilidat pa reunion tékniko, trato médiko i seguridat pa tur delegashon.

Transporte
Transporte tambe ta reglá pa tur delegashon for di momento ku nan yega aki na aeropuerto. Tur delegashon lo wòrdu transportá durante nan estadia pa tur nan weganan korespondiente, pero tambe pa tur entrenamentu programá. Bon pa menshoná ku ya for di tres siman pasá, tur delegashon mester a entregá nan skema di entrenamentu, di manera ku tur esakinan por a keda programá.

Lista di hungadó
Ya for di siman pasá mester a entregá e ‘Provisional Players Roster’ konsistiendo di máksimo 30 hungadó. Miéntras tantu, pa djabièrnè awó, dia 15 mart 2019, mester indiká na Concacaf, e lista definitivo di 20 hungadó.

Chekeo médiko i kuminda
Tur hungadó mester pasa un chekeo médiko kompleto, inklusive testnan di sanger i lo mester wòrdu di ‘clear’ medikamente, pa asina por partisipá na e torneo. Tambe kada delegashon mester a entregá ya for di 3 siman pasá, nan lista di kuminda, pa asina e organisashon por atendé ku e alimento apropiá pa ku kada delegashon.

Stadion
E weganan lo tuma lugá na Stadion Ergilio Hato i Stadion Antoine Maduro, miéntras ku terenonan pa entrenamento lo ta Vesta, Sithoc, FFK i tambe Asiento. Tur dia lo entrená di akuerdo ku e skema ya entregá.

Gastunan i patrosinio
E gastunan ta keda kalkulá na alrededor di 1.1 pa 1.2 mion florin. Concacaf ta kontribuí ku un parti, miéntras ku LOC, lo ta responsabel pa kubri sobra gastunan. E proseso pa patrosinio ta andando i LOC ta spera tambe un bon reakshon di públiko pa asistí na e weganan, espesialmente na e weganan di Jong Holland, kendenan ta den representashon di Kòrsou!•