Veredikto MCB kontra Robbie posponé

131
Warda: empleadonan di Robbies bahando korte. Nan mester warda un siman mas pa sa nan destino.
Punda— E veredikto kual wes mr. Pieter de Kort mester a duna awe den kuadro di e problema di MCB bank i riferonan, a keda posponé. Esaki ta lokual abogado mr. Bertie Braam a duna di konosé ayera na Vigilante. Segun e abogado, chèns ta grandi ku e dianan aki korte tin hopi trabou i kisas esaki lo a stroba e veredikto di Sali.

Manera ta konosí, pa algun luna tras di lomba, Dos Santos ta tratando na yega na areglo ku e dos bankonan riba un desishon ku nan a tuma pa finalisá e relashon bankario ku Dos Santos. E bankonan ta konsiderá Dos Santos su kompania nan i tambe demas riferonan komo grupo di kompania ku “riesgo haltu”. Lokual e bankonan kier men ku riesgo haltu, no ta konosí, pero mundu komersial finansiero ta asumí ku nan kier men riesgo pa labamentu di plaka. Bankonan internashonal korespondiente a kuminsá pone hopi kondishon riba bankonan lokal pa evitá tur kuenta katalogá komo riesgo ku posibilidat di labamentu di plaka. Tur organisashon kliente di banko ta rekerí na kumpli ku reglanan di “compliance”, esta eksigensianan di eksonerashon pa labamentu di plaka. Dos Santos ta splikando MCB i Windward Islands Bank, ku serka nan no tin niun riesgo di por tin labamentu di plaka via di su organisashon. Hasta su kuentanan anual ta disponibel pa mira.

De Kort ta bai tin un desishon difísil den e kaso aki. Durante tratamentu el a puntra abogadonan di MCB si  no tin un banko pa Dos Santos pone su sèn ariba, ta unda e mester bai anto. Segun de Kort, si e tin un pèrmit di loteria, e no tin niun kaminda pa pone su sèn na Kòrsou. Despues ku MCB a duna Dos Santos un ultimatum di 31 di mart pa sera su kuentanan, el a bai buska na otro banko, sin éksito. E wes a keda pensa basta largu riba e situashon i hasta pronostiká ku kisas na Kòrsou tei bini un merkado nobo pa bankonan ku tei hasi transakshon lokal so, sin mester kumpli ku eksigenshanan di reputashon di bankonan internashonal.

MCB a splika wes ku ta un kestion di evaluashon di interes. Di un banda nan tin un kliente di otro banda nan mester protehá interes general den kuadro di mantenshon di nan kumplimentu ku reglanan imponé pa Banko Sentral pero tambe bankonan internashonal.  Dor di mantené un nivel di kumplimentu nan ta tene nan reputashon, abogado van Hees a splika na wes mr. Pieter de Kort. Den kuadro di kumplimentu, bankonan mester investigá reputashon di nan klientenan, esaki pa determiná di tin aktividatnan sospechoso. Segun van Hees e konfiansa di públiko en general mester keda pa banko. Esaki ta enserá ku klientenan manera Robbie Dos Santos i klientenan den wega di number ta kai den un kategoria di riesgo. I MCB, segun artíkulo 37 di nan kondishonnan, por finalisá un relashon i sera kuenta si akaso e kliente no a kumpli ku nan eksigenshanan. Un posibilidat lo por tin si akaso Dos Santos gana e kaso. Esei ta ku MCB por bisa e bankonan internashonal ku e tin un veredikto di korte kual e no por skapa fo’i dje.

Esaki lo ta e mihó solushon den e kaso aki. Pero si akaso, MCB gana e kaso, chèns ta grandi ku demas riferonan lo analisá bou di kual kondishon e banko a gana e kaso. Úniko faktor ku por ta den kontra di Dos Santos ta lokual MCB a trese dilanti. E banko a bai bek den buki di Dos Santos. Nan a bisa korte ku Dos Santos a wòrdu kondená den pasado pa labamentu di plaka, falsifikashon i desvio di impuesto pa un total di 70 mion dòler estado unidense. Segun van MCB, den e veredikto di wes a keda konkluí ku Dos Santos a uza kuentanan di banko na MCB i WIB entre 2008 pa 2013 pa logra lokual e la wòrdu kondena p’e ademas tambe e kompanianan kual a entamá e proseso a risibí kastigu di multa. Si esaki resultá e kaso e problema di MCB ta mas grandi. Demas riferonan, ku no tin un kondena sigur lo inisiá un kaso momento e banko ninga di mantené nan kuenta nan di banko.