“Ban yega stadion i sostené Kòrsou i Jong Holland”

Konosido eks artista i gran fanátiko trikolor ‘Cheli’ Merien:

373
Sr. Merien sintá den SDK, pa asina gosa di wega di su ekipo Jong Holland.
WILLEMSTAD—E konosido eks artista lokal, kende ta gran fanátiko di e ekipo kampion lokal di futbòl FFK, e trikolornan di Jong Holland, tambe ta pendiente pa e Pre-kampionato di ‘Champions League’ di Karibe. Esaki pa motibu ku su ekipo lo ta parti di e gran fiesta di futbòl aki, hungando na kas, durante di e periodo di 5 te ku 15 aprel próksimo.
‘Cheli’ dunando deklarashon ayera na prensa deportivo, relashoná ku e torneo di Concacaf.

Ta trata aki di Raymundo Urley Merien, mihó konosí komo ‘Chely’ Merien, kende awe ta selebrando su di 81 aña  di bida. ‘Cheli’ a splika di ta un gran fanátiko di Jong Holland, for di na chikí den bario di Charo, for di unda tambe e ekipo a konta ku diferente futbolista ku tabata importante pa nan logronan.

“Mi mes a skòp bala i partisipá den weganan den bario so. Speshalmente riba tereno den bario di Charo, pega ku kas di ‘Ma Lodi’, kende ta mama di un di e gran eks-futbolista ku e ekipo a konosé, ku ta Fèfè de Lanoy. Ora nos tabata hunga den bario kaminda mi a lanta, semper nos kier tabata un di e gran hungadónan di Kòrsou mes, unda hopi di nos, semper a trata di imitá ‘Fèfè’.

E ekipo tin un historia largu mirando ku e aña aki nan ta selebrá 100 aña, unda tabatin hopi bon futbolista ku a hunga den e ekipo.Tambe e ekipo a logra hopi titulo, unda pa ami esun mas dushi tabata e último, aña pasá i p’esei Jong Holland por ta representando Kòrsou awor aki. E kampionato aki mi no a bai muchu wega te ainda. Kos no a kuminsá meskos ku aña pasá, pero mi tin sigur ku e hungadónan ku nos tin, huntu ku e trabounan ku Farleynan ta hasi, ku kos ta bòltu i nos ta logra bira kampion selebrando 100 aña i tambe lo hasi un bon papel den e torneo di Concacaf, na nòmber di Kòrsou.

Sigur lo mi ta presente pa sostené Kòrsou i Jong Holland durante di e weganan benidero i ta hasi un invitashon pa un i tur yega stadion, prinsipalmente den grupo di famia, ku nos hóben i tambe nos muchanan. Ta algu grandi, ban yena stadion i gosa di futbòl internashonal”, e kumpleañero di awe, kende ta Jong Holland del alma, ‘Cheli’ Merien a deklará.