Dies morto registrá den tiroteo na un skol di Brasil

38
Outoridatnan ku a presentá na e sitio di e tiroteo.

RIO DE JANEIRO – Un tiroteo registrá na un skol den e region metropolitano di Sao Paulo, Brasil, a laga saldo di dies morto, entre nan sinku menor di edat.

Segun e kuerpo di bombero di Sao Paulo, e otro víktimanan fatal lo tabata trahadónan di e skol i tambe dos hóben, kende nan supuestamente tabata esnan responsabel di e tiroteo aki.

E otro dos personanan ku a pèrdè nan bida, a fayesé na e sentro médiko unda nan a keda trasladá pe despues di e suseso.

Un bosero polisial a splika na medionan di komunikashon, ku dos persona kara tapá, aparentemente e dos hóbennan, a drenta den e skol publiká Raul Brasil, na Suzano i situá na 60 kilometer di e kapital i a lòs vários tiru na e sitio.

E kabes di e skol a keda gòlpiá i segun informashonnan polisial, esaki tambe a resultá heridá i tambe a pèrdè su bida. Dòkternan na e sitio a atendé un total di dies persona mas ku a resultá heridá, di kua ainda no ta konosí kuantu ta mucha.

E gobernador paulista Joao Doria i e sekretario di Edukashon, Rossi Soares da Silva, a suspendé su agènda i a dirigí su mes na e sitio di e echonan.

Segun outoridatnan mes a indiká, entre e dies personanan ku lamentablemente a pèrdè nan bida, tin sinku menor di edat. Esaki nan aparentemente alumnonan di e skol unda e suseso a keda registrá. Esaki nan no a keda públikamente identifiká i tampoko a duna niun informashon relashoná ku nan edatnan.

Di otro banda ainda no ta konosí kiko presisamente a sosodé òf a provoká akto di e dos hóbennan responsabel den e tiroteo aki. Outoridatnan di nan banda ta sigui ku e investigashonnan den e kaso aki.