Muhé di 122 aña ke keda rekonosé komo esun mas grandi di mundu

1477
Muhé peruano kende ta indiká ku na luna di mei próksimo lo kumpli 123 aña.

LIMA – E muhé peruano Andrea Gutierrez Cahuana ke keda rekonosé komo e muhé mas grandi di mundu na momentu ku e tin un total di 122 aña di edat, segun su dokumentonan di identidat. Segun informashonnan, su fecha di nasementu ta dia 25 di mei di aña 1896.

E título di e persona mas grandi di mundu ta na nòmber di e hapones Kane Tanaka, di 116 aña, segun e organisashon di Records Guinness.

Den kaso ku akreditá esaki su edat, e peruano ta tambe den kondishon di gana e franses Jeanne Calment, kende tin e rèkòrt riba su nòmber di e muhé ku a biba mas na mundu, bibando 122 aña i 164 dia.

Andrea Gutierrez a nase na Oyolo, un pueblo chikí di los Andes peruano, kua ta situá den e provinsia di Páucar del Sara Sara, kua ta pertenesé na e region di Ayacucho.

E aña di su nasementu ta koinsidí ku promé Weganan Olímpiko moderno na Atenas, i na Perú e ta koinsidí ku e rekonstrukshon di e pais despues di Guera di Pasífiko ku Chile.

Aktualmente e peruano ta biba den un bibienda sumamente prekario di Arequipa, e segundo siudat mas grandi di Perú, unda e ta bou di kuido di su yu hòmber Pedro Palacios i su kuñá Fransica Acapana, kendenan tin kasi 80 aña.