Pasaheronan TUI por a bai kas ayera

53
un Boeing 737 MAX 8 di TUI na Schiphol; 2 avion di e tipo aki a kai den 6 luna
SCHIPHOL—TUI a saka e pasaheronan ku a keda pega den eksterior pasobra a prohibí aterisahe di Boeing 737 MAX 8, asina nan por a regresá Hulanda ayera.

Ta trata di pasaheronan ku tabata den dos avion di Boeing 737 MAX 8 ora departamentu di aviashon den Oropa a sera espasio aereo pa e tipo di avion aki. Un vuelo di TUI for di Gambia mester a desvia pa Gran Canaria. E otro vuelo ku a sali for di Egipto mester a desvia pa Sofia na Bulgaria. Dos otro tipo di avion a sali ayera mainta for di Hulanda pa buska e pasaheronan na Gran Canaria i Sofia. TUI tin dos Boeing 737 MAX 8 den nan flete, ku mester keda tera. E kompania a hur ekstra avionnan pa yena e buraku ku a surgi. Esnan ku mester bai vakashon por bai normal segun plan, asina TUI a informá. TUI mester kalkulá e konsekuensianan finansiero di prohibishon di espasio aereo na Oropa pa e Boeing 737 MAX 8/9. TUI su prioridat ta pa tur hende por bai nan vakashon segun plan. Nan ta spera un update digital di Boeing denter di algun dia. Esaki mester solushoná e problema ku a okashoná e aksidente ku e Boeing 737 MAX 8 di kompania indones Lion Air den septèmber kaminda 189 hende a muri. Despues ku e avion di Ethiopian Airlines a kai djadumingu un kantidat di pais a sera espasio pa Boeing 737 MAX 8 i 9. E aksidente a kosta bida di 157 hende. Seramentu di espasio aereo ta un medida di prekoushon pasobra e motibu di e aksidente na Etipia no ta konosí ainda. Ainda mester investigá e kahanan pretu di e avion. Esaki lo tuma lugá den eksterior pasobra Etiopia no tin e ekiponan ni fasilidatnan pa hasi e investigashon. Director di Ethiopian Airlines a bisa den un entrevista ku BBC ku mester bini prohibishon pa tur avion Boeing 737 MAX 8 te ora bini klaridat riba seguridat di e avionnan.