Reunion urgente yama pa Gerente i Roadmanager di Orkesta Vega

225
E tin plan nan grandi ku su banda Orkesta Vega

WILLEMSTAD,—-Ya no ta un sekreto ku despues di e temporada di Karnaval tin masha hopi moveshon ta tuma lugá den nos farándula lokal. Ya ta un tradishon ku manera e temporada di Kuaresma drenta ta lanta un lokura den farándula na Kòrsou, esaki ta loke ku ta sosodé ya pa masha hopi dékada.

Ayera anochi Gerente i Roadmanager di agrupashon musikal Orkesta Vega a yama un reunion urgente pa tur músiko di e banda. E reunion a tuma logá den Club CONGA. Mester bisa ku e dia nan aki ta masha hopi ta e rumor nan ku ta kore den kaya rondó di algun músiko di Orkesta Vega.

Esaki a pone ku Gerente i Roadmanager di e banda a yama tur músiko pa asina tende kiko ta nan plan pa ku e banda, asta nos a haña informashon ku tantu Gerente i Roadmanager  su liña prinsipal ta “esun ku ke bai, ata e porta ei”.

Nos tin informashon ku tin plan nan hopi serio pa ku agrupashon musikal Orkesta Vega, asta nos tin informashon ku tin un kompaña hopi grandi ku a firma un kontrakt ku gerente di e banda en kuestion. Esaki mes ta e motibu prinsipal ku a yama e reunion urgente ayera, paso gerente di e banda ke sa ken tur ta e músiko nan ku ta kla pa keda ku e banda i den mes un rosea ta kua di e músiko nan ku no ke sigui mas ku e banda. Mañan ‘E Mulina’, ta bin ku mas informashon rondó di e banda reunion ku a tuma lugá ayera den Club CONGA di agrupashon musikal Orkesta Vega.