No tin peliger di buelo riba Boeing 737 MAX 8 pa Kòrsou

Anke 4 Aeroliña bulando Kòrsou tin e avion ku bou di investigashon den nan bolsa

427
Hato—Tin 4 kompania di aviashon, kende ta bula ruta di Kòrsou, tin den nan bolsa e avion Boeing Max 8 737, kual tipo di avion a kai siman pasá na Ethiopia matando 157 persona a bordo.  Tin un investigashon internashonal andando despues ku e avion a bin kai, miéntras diferente aéreoliña internashonal a pone e avion riba plataforma, pendiente resultado di e investigashon nan.

E kaida na Ethiopia ta e di dos den 6 luna, despues ku un aparato Boeing Max 8 737 di Lion Air a bin kai meskos den laman na Java matando 189 persona a bordo. E kompanianan di aviashon, TUI, Corendon, Copa i American Airlines ta uzando mesun tipo di avion, pero no riba ruta di Kòrsou.  Miéntras mitar mundu a baha e aparatonan, tur 4 kompania menshoná ta sigui uza e tipo di avion. Na Kòrsou, outoridat di aviashon sivil mester ta atento pa esaki.  Ámbos kaida ta bou di investigashon, miéntras no tin prueba di un kousa komun den relashon di e kaida nan. Tin aproksimadamente 350 Boeing 737 Max 8 ta bulando rònt mundu dor di 54 operador. Esaki segun FAA, (Federal Aviation Administration).  Entretantu, algun kompania grandi a “ground” nan 737 Max 8 pendiente e investigashon.

Ken a stop Boeing 737 Max 8
Entre e paisnan ku a ordená pa baha e aparatonan fo’i den laria ta China (China Airlines, China Eastern, China Southern). Entre e tres kompanianan tin 97 aparato Max 8 737 Boeing, ku ta kasi 25% di e total aparatonan den operashon na mundu. E atministrashon di aviashon sivil na China a ordená tur kompania pa stòp di bula e aparatonan te dia bini mas klaridat. Na Singapore, a para mesora operashon di tur aparato. Esaki ta konta pa tur buelo ku ta drenta i sali e pais. Esaki den kuadro di e dos aksidentenan den ménos di 5 luna ku mesun karakterístika. Ta trata di e siguiente kompanianan ku mester a stòp nan aparatonan di bula pa Singapore: Silk Air,  China Southern Airlines, Garuda Indonesia, Shandong Airlines i Thai Lion Air. Na Indonesia tur avion Max 8 737 di Boeing ta di ground pa un temporada indefiní e medida lo ta na vigor. Den un komunikado ofishal  e entidat di aviashon sivil nashonal a splika ku tur avion ópera na Indonesia mester ta den kondishon pa por bula sigurá. Na Mexico, Aeromexico a anunsiá di suspendé tur buelo ku nan aparatonan. Meskos ta konta pa Aerolinas Argentina (5 aparato), Cayman Airways (2 aparato), Comair Airways di Sur Afrika, Easter Jet di Sur Korea (2 aparato).

Ken no a stòp Boeing 737 Max 8
Pero no ta tur kompania na mundu a stòp nan buelonan riba e Boeing 737 Max 8. Entre nan tin kuater kompania ku ta bula Kòrsou. Ta trata di TUI, Corendon, COPA Airlines i American Airlines. Pa lokual ta trata American Airlines e kompania tin un kantidat di 24 aparato Max 8 ta uza di Boeing. Den un komunikado ofishal, e kompania a duna su kondolensha na famia di e defuntunan riba e buelo ET320 ku a kai na Ethiopia, pero nan ta sigui monitor e investigashon di e kaida. E kompania a ninga di baha su aparatonan. American Airlines ta unu di e kuater operadornan ku ta ópera  e djètnan MAX 8 for di Èrport Internashonal di Miami. Tur e 24 aparatonan MAX 8 di American Airlines ta bula for di Miami, representando 90 buelo diario pa Estádos Unídos mes i Karibe.  Pa Kòrsou, e kompania ta uza nan Boeing 737-800.

TUI na yanüari 2018 a bira e promé kompania di aviashon sivil den Benelux ku ta uza e serie di Boeing 737 MAX 8. En total e kompania a bestèl 70 aparato MAX 8 serka Boeing pa entrega durante añanan benidero.  TUI internashonalmente no tabata kier a duna komentario i splika ku nan tambe ta monitor e investigashon pero no tin niun indikashon pakiko nan lo mester stòp, konsiderando nan operashon i sistema di siguridat. Segun bosero di TUI na Amsterdam, Anke van Nieuwenhuizen, nan desishon ta basá riba outoridat di aviashon sivil estado unidense. Segun Nieuwenhuizen, nan tin kontakto estrecho ku e agensha di aviashon sivil oropeo (EASA) i ku FAA na Estádos Unídos. E bosero a bisa medionan di komunikashon ulandes ku nan ta siguiendo instrukshon abase di e aksidente na Ethiopia. I ámbos organisashon, esta AESA i FAA no a duna TUI instrukshon pa baha nan aparatonan MAX 8 737. Na yüni 2014 TUI a atkerí nan promé Boeing Dreamliner Boeing 787-8. En total nan tin 3  kual nan ta bulando e ruta di Kòrsou kuné.

Copa Airlines a menshoná ofishalmente di ta warda riba resultado di e investigashon i no ta baha su aparatonan. “Nos ta evaluando kua paso pa tuma i ta keda den kontakto estrecho ku atministrashon di aviashon sivil nashonal”, bosero di Copa a duna di konosé na Reuters. For di yüli 2017, Copa ta bula diariamente di Panama pa Kòrsou uzando un Boeing 737-700/800 òf un E190. Corendon Airlines, kende resientemente a anunsiá nan koperashon ku Divi Divi Air na Kòrsou, tambe tin algun djèt Max 8 den nan operashon i ta pendiente pa dos mas na 2019 i 2020. Durante temporada di winter, e kompania a stashoná un Boeing 737 800 na Kòrsou, kual no ta e MAX 8. E aparato na Kòrsou ta den kuadro di un koperashon ku Divi Divi pa buelonan di Sao Paolo. Corendon no a duna un reakshon ofishal ainda riba su uzo di nan aparatonan MAX 8 di Boeing despues di e último kaida na Ethiopia. Pero despues di e promé kaida di un otro MAX 8, 5 luna pasá si Corendon a deklará.  Segun “Corendon Nederland”, a bisa despues di e promé kaida den laman di Java; “De indruk bestaat dat dit type toestel tot de vloot van Corendon Nederland behoort, maar dat is niet het geval. Uiteraard nemen onze dochtermaatschappij en wij de veiligheidswaarschuwing serieus”. Lokual e bosero ke bisa ta ku Corendon no ta uzando su djètnan MAX 8 via nan kompania Ulandes sino via di e frankisia Turko. Aktualmente tin 4400 order na Boeing pa aparatonan MAX 8 737.