Yunan di Kòrsou mester kontrolá riba kua Boeing ta bula

483
Stòp: Presidente Donald Trump dos dia pasá a anunsiá ofishalmente ku na Estádos Unídos tambe a stòp di bula e avion nan. American ta ópera tur su Max for di Miami.
Hato— Yunan di Kòrsou ku ta saliendo for di Hato riba konekshon di buelo internashonal, mester kuminsá investigá riba kua avion nan ta bula. Esaki den kuadro di e resien rechaso den hopi pais pa nos aseptá e Boeing 737 Max /Max 9, despues ku dos aksidente den ménos di 6 luna tuma lugá.

Manera publiká pa Vigilante e siman aki, tin 4 kompania di aviashon ta bula ruta di Kòrsou ku tin den nan bolsa e avion Boeing Max 8 737. Anke ningun dje kompanianan menshoná ta uza e aparato den peliger riba ruta di Kòrsou, riba nan konekshon nan si por tur tin e posibilidat ei. E kaida na Ethiopia ta e di dos den 6 luna, despues ku un aparato Boeing Max 8 737 di Lion Air a bin kai meskos den laman na Java matando 189 persona a bordo. E kompanianan di aviashon, TUI, Corendon, Copa i American Airlines ta uzando mesun tipo di avion, pero no riba ruta di Kòrsou.  Miéntras mitar mundu a baha e aparatonan, tur 4 kompania menshoná ta sigui uza e tipo di avion. Na Kòrsou, outoridat di aviashon sivil a emití un komunikado unda nan ta prohibí tipo di avion menshoná drenta nos espasio.

Entre e paisnan ku a ordená pa baha e aparatonan fo’i den laria ta China (China Airlines, China Eastern, China Southern). Entre e tres kompanianan tin 97 aparato Max 8 737 Boeing, ku ta kasi 25% di e total aparatonan den operashon na mundu. E atministrashon di aviashon sivil na China a ordená tur kompania pa stòp di bula e aparatonan te dia bini mas klaridat. Na Singapore, a para mesora operashon di tur aparato. Esaki ta konta pa tur buelo ku ta drenta i sali e pais. Esaki den kuadro di e dos aksidentenan den ménos di 5 luna ku mesun karakterístika. Ta trata di e siguiente kompanianan ku mester a stòp nan aparatonan di bula pa Singapore: Silk Air,  China Southern Airlines, Garuda Indonesia, Shandong Airlines i Thai Lion Air. Na Indonesia tur avion Max 8 737 di Boeing ta di ground pa un temporada indefiní e medida lo ta na vigor. Den un komunikado ofishal  e entidat di aviashon sivil nashonal a splika ku tur avion ópera na Indonesia mester ta den kondishon pa por bula sigurá. Na Mexico, Aeromexico a anunsiá di suspendé tur buelo ku nan aparatonan. Meskos ta konta pa Aerolinas Argentina (5 aparato), Cayman Airways (2 aparato), Comair Airways di Sur Afrika, Easter Jet di Sur Korea (2 aparato). E kuater kompanianan TUI, Corendon, COPA i American Airlines tur ta uzando e tipo di avion Boeing 737 Max 8. Di e kuater kompanianan, tres di nan esta, COPA American i TUI  a menshoná di a “ground” tur nan avion Max 8. Presidente Donald Trump dos dia pasá a anunsiá ofishalmente ku na Estádos Unídos tambe a stòp di bula e avion nan.  TUI na yanüari 2018 a bira e promé kompania di aviashon sivil den Benelux ku ta uza e serie di Boeing 737 MAX 8. En total e kompania a bestèl 70 aparato MAX 8 serka Boeing pa entrega durante añanan benidero. TUI internashonalmente no tabata kier a duna komentario i splika ku nan tambe ta monitor e investigashon pero no tin niun indikashon pakiko nan lo mester stòp, konsiderando nan operashon i sistema di siguridat. Finalmente nan tambe a opta pa baha e Max 8. Na yüni 2014 TUI a atkerí nan promé Boeing Dreamliner Boeing 787-8. En total nan tin 3  kual nan ta bulando e ruta di Kòrsou kuné.