Agrupashon di Gospel TRUE ku presentashon di nan CD nobo

55
Dia 30 awor nan CD lo bai ta riba merkado.
WILLEMSTAD,—-Agrupashon di Gospel “The Real Unity Experience” T.R.U.E. a inisiá na aña 2006 ku e meta pa ministra pa medio di diferente género musikal, pero ku énfasis riba “Ritmo Kombiná” E agrupashon a wòrdu funda pa  Sharyon De Lanoi, Mernick Martha i Rodney Mambre. T.R.U.E ta risibí konseho i guia spiritual serka Pastor Everon Rosini i ta funshoná bou di enkargo di Clifton Hariquez komo lider di grupo, direktor musical i kompositor.

Un di e faktor nan di mas bunita di e agrupashon aki ta ku e integrantenan, músikonan i kantantenan ta bishita diferente iglesia i tin diferente idiologia. Komo agrupashon e banda T.R.U.E. ta representá i ke kultivá e aspekto di Unidat den Kristu. E formashon musikal T.R.U.E. ta toka na diferente evenementonan entre otro kasamentu,hasimentu di aña, aktividatnan soshal i hopi otro eventonan. Nada no ta limitá T.R.U.E komo agrupashon, den alabá i glorifiká Dios, te na fin di mundu.

E aña aki e agrupashon a produsí nan CD nobo titulá “E Bèrdat” i lo release esaki djasabra 30 di mart 2019, 6’or pa 8’or anochi di anochi, i ta ekstendé un invitashon na un i tur i ta ofresé esaki na e públiko pa nan risibí mensahenan ku lo enrikesé nan bida. E evento ta tuma lugá na Jan Boos 110.

T.R.U.E. lo aserka radionan lokal i Internashonal ku e petishon pa nan músika wòrdu toka i skucha via nan emisora pa asina e públiko por risibí enkurashamentu i un tremendo bendishon. Meta tambe di e agrupashon ta pa motivá, enkurashá i invertí den e hubentut pa nan tambe desplegá nan talentonan den músika Kristian, i asina sirbi nos komunidat i ta parti pa haña solushon di e problemanan ku nos ta enfrentá. Pronto e CD “E Bèrdat” lo ta optenibel  tambe na librerianan, iglesianan  i serka miembronan di e agrupashon. Pa mas informashon por tuma kontakto via telefon 525-8735 òf 675-2695.