Ban animá Jong Holland den representashon di Kòrsou

Torneo Concacaf 2019 riba nos isla...

200
Esnan kende ayera a duna informashon na prensa.
WILLEMSTAD—Ayera den oranan di anochi a tene un rueda di prensa unda a duna informashon relashoná ku e grandioso torneo di futbòl ku lo mira akshon riba nos isla próksimamente. Ta trata di torneo ku lo hunga di 5 te ku 15 aprel benidero riba tereno di stadionnan Ergilio Hato i Antoine Maduro, ku presensia riba nos isla di 12 ekipo kampion di islanan di Karibe. Ku e ekipo trikolor di Jong Holland, komo kampion lokal lo forma e di 13 ekipo pa e torneo.
Presidente di e komishon organisadó Stanley Coffie, huntu ku presidente di Jong Holland, Etienne Rosaria.

Ayera miembronan di e komishon organisadó, huntu ku presidente di FFK, presidente di Jong Holland i tambe Lilo Sulvaran, kende ta esun enkargá ku prensa pa e komishon organisadó a hiba palabra.

Tur esaki despues ku tabata durante di e último dianan ku tabatin 2 persona di Concacaf, un biaha mas tabata presente riba nos isla, pa asina kontrolá e partinan tékniko pa ku e kompetensia. Pa inisio di luna di aprel, promé ku inisio di e torneo nan lo ta bèk riba nos isla.

Pa loke ta e torneo mes, e wega di djabièrnè dia 5 anochi entre Jong Holland i e ekipo di Cuba, lo bai bira e apertura ofisial di e torneo, unda lo bai tin un parti ofisial promé ku e partido.

Algun di esnan kende tabata den sala ayera.

Miéntras ku próksimamente tambe lo inisiá ku benta di karchinan di entrada, unda por paga 10 florin pa presensiá e weganan ku bo kier hinter e dia, òf tambe bo por kumpra un pakete di 50 florin pa asina mira tur wega ku bo ta deseá riba e 6 diferente fechanan di e torneo, na kua stadion ku bo ta deseá.

Miéntras tantu Lilo a konfirmá ku ya a reuní ku miembronan di prensa i ta trahando riba promoshonnan pa e torneo aki, unda ku tambe próksimamente lo bai hasi publikashon di 30 mil ehemplar di un korant di 24 página, ku hopi informashon speshal dediká na e torneo.

Pues trabounan ta kanando pa e grandioso fiesta di futbòl riba nos isla, unda abo mester kuminsá reservá e fechanan aki i sòru pa kumpra bo karchi manera esakinan ta na benta i animá Kòrsou den e evento.•