Foi prinsipio mi tabata afó dus lagami afó

232
E la dal telefon sera den nos orea.

WILLEMSTAD,—-Den e dia nan aki tin masha hopi moveshon den nos farándula rondó di agrupashon musikal ICONS. ‘E Mulina’, a haña informashon ku e legendario kantante kompositor areglista Gibi Doran tampoko no ta forma parti mas di ICONS.

T’asina ku manera ku nos a haña e informashon ‘E Mulina’, a hasi Gibi Doran un yamada, pa asina nos tende for di su mes un boka si e ta forma parti di ICONS si òf no Esaki tabata palabra nan di Gibi Doran ku ta rekonosé komo E papa di Ritmo Kombiná  i komposishon nan ku a marka historia, na momentu ku ‘E Mulina’,  a tuma kontakto kuné riba e desaroyo nan den ICONS.

E la bisa nos ku “foi un prinsipio mi tabata afó, dus lagami afó. Mi no tin komentario. Mi ta kere ta mas mihó tuma  kontakto ku maneho di ICONS. Lagami afó”. Gibi tabata hopi kòrtiku ku nos na telefon, pero den mes un rosea ‘E Mulina’, a bisa Gibi ku, nos tin informashon ku djaweps i djasabra tras di lomba bo abo i e sinku músiko nan ku ta Almier, Juni, Henry, Nato i Marcus tabata den un reunion ku a tuma lugá na Radio Mas 99.7. Awèl mester bisa ku Gibi a dal su telefon sera laga ‘E Mulina’, ku palabra na boka.

Loke si ku Gibi a lubidá ta e echo ku ‘E Mulina’, tin su fuente nan tur pero tur kaminda, i esaki ta pone ku ‘E Mulina’, semper ta keda bon informá di tur moveshon i posibel moveshon nan ku ta tumando lugá den nos farándula. Aki tambe sin duda ‘E Mulina’, ta bai keda ku wowo nan di falki.