Miembronan di un famia hañá sin ta duna señal di bida na Bolivia

101
Investigashonnan den e kaso aki ya a inisiá.

LA PAZ – Outoridatnan polisial di Bolivia a haña un famia den oranan di djasabra último den e region na sùit, Tarija, sin ta duna señal di bida. Un total di seis integrante di e mesun famia, inkluyendo menornan di edat, a fayesé den sirkunstansianan ku ainda ta keda investigá.

E kurpanan sin bida a keda hañá den e bibienda partikular den e lokalidat ariba menshoná di Yacuiba, na e frontera ku Argentina, unda outoridatnan polisial i fiskalnan a presentá pa asina inisiá ku e investigashonnan.

E víktimanan ta un pareha i su kuater yunan, tres mucha muhé i un mucha hòmber, segun medionan di komunikashon di e pais.

Segun a keda indiká, lo hasi outopsia di lei i lo determiná di e forma aki e kousanan eksakto di morto di e personanan aki i lo por duna mas detaye di esaki aki algun dia.

Outoridatnan polisial di e pais a keda poné na altuura di e situashon debí na yamada telefóniko di un bisiña.

E echo ku tin hende muhé entre e víktimanan, outoridatnan a disidí di manda un grupo di agentenan di Frosa Spesial di Lucha kontra Violensia, pa asina por adelantá e investigashonnan.

Di su banda, fiskalnan di e unidat spesial den delitunan di violensia kontra hende muhé, a hasi un rekonosementu na e lugá.

Medionan di Yacuiba a informá ku ta sospechá ku e hòmber a asesiná su kasá i e menornan di edat i despues a kometé suisidio, aunke ku outoridatnan di nan banda no a konfirmá i tampoko rechasá e vershonnan aki.

Algun bisiña di e sitio a deklará na medionan di komunikashon ku e famia tabatin algun problemanan ekonómiko.

E adultonan ku a pèrdè nan bida tabatin entre 38 i 39 aña di edat, miéntras ku e edat di e menornan di edat ta varia entre 7 i 12 aña.