Refineria Isla a gasta 9 mil mion florin na mantenshon

For di 1985 te ku awe

255
Refineria Isla a gasta 9 mil mion florin na mantenshon
Isla– Den e presentashon di Refineria di Kòrsou (RdK) na personal di Refineria Isla Curaçao BV siman pasá, RdK a trese pa dilanti ku “mantenshon di e aktual operador a laga hopi di deseá”. Esaki, supuestamente, tambe lo ta hungando un ròl desbentahoso den e proseso pa yega na un operador nobo.

E alegashon aki no ta bèrdat. E echonan ta lo siguiente: Na inisio di e kontrakt na 1986 Refineria di Kòrsou huntu PDVSA a laga hasi un ouditoría pa determiná estado di e refineria. E ouditoría a keda hasí  pa e kompania Flour-Daniel. E ouditoría a konkluí ku e refineria su kondishon no tabata optimal pero tòg sufisiente bon pa por operá. Tambe e ouditoría di 1986 a konkluí ku tabatin 216 tanki ku mantenshon retrasá. Durante e periodo di 1985 te ku 2018, Refineria Isla a invertí 9 mil mion di florin den mantenshon di e instalashonnan di e refineria. Esaki ta un promedio di 270 mion florin pa aña. E sifranan aki ta dokumentá den Refineria Isla su sistema di SAP.

Durante di e periodo di 1985 te ku 2018, RdK a hasi mínimo uso di su derechi i obligashon pa hasi inspekshon di e instalashonnan di e refineria. E kontrato entre PDVSA i Rdk defakto ta enserá ku RdK ta responsabel pa mantenshon pa desgaste kousá pa uso normal (normal wear and tear) di e refineria. RdK nunka a asumí responsabilidat pa mantenshon konforme su obligashon kontraktual; Refineria Isla semper a karga ku tur gastu relashoná ku ‘normal wear and tear’ di e refineria. Refineria Isla for 1995 ta operá ku hendenan lokal den maneho i gerensia di e refineria.

Defakto, diferente di e aktual aktornan di RdK ta èks trahadónan di e mesun Refineria Isla. Komparashon ku standartnan internashonal di gastu di mantenshon versus balor di e propiedatnan, ta mustra ku na Kòrsou su refineria, a gasta mas di loke ta komun internashonalmente. Refineria Isla tin 33 aña di operashon sigur. Esaki ta afirmashon di e seguridat di e plantanan komo resultado di e mantenshon ku a ser hasí. Refineria Isla ya tin mas ku 20 aña ta manten’é sertifikashon di ISO. Refineria Isla a ser evaluá pa diferente kompania di reputashon internashonal manera Shell Global Solutions, Delta Catalytic i Solomon Brothers. Nunka ningun di nan a yega na e konklushon ku mantenshon di e refineria a laga di deseá.  Bunitesa físiko no ta refleho di salú tékniko; e refineria por laga di ta bunita, pero salú si e ta.

Por último, Refineria Isla ta di opinion, ku pinta e estado di mantenshon di e refineria malu, no ta na bienestar di futuro di e trahadónan di e refineria. Manera ta konosí, ta buskando un operador nobo pa e refineria. E proseso aki ya a konosé diferente kontratempu grandi. Pinta e refineria malu, lo hasi aun mas difísil pa atraé un operador nobo poniendo asina pan di mas di 2000 yu di Kòrsou na peliger.

 

Foto 1 Earl Balborda

Segun Relashonista Publiko di Isla BV Earl Balborda, Refineria Isla ta di opinion, ku pinta e estado di mantenshon di e refineria malu, no ta na bienestar di futuro di e trahadónan di e refineria.