PIN: mester adaptá e fruta i bèrdura den e areglo di makutu básiko

527
Anunsiá: For di djaluna último, lider polítiko di e partido, Suzanne Camelia Römer a splika ku den fin di siman nan partido tabatin un wikènt di estudio.
Punda– Partido Inovashon Nashonal (PIN) ta realisá ku tempu ta difísil pa hopi hende. Mas ainda awor ku gobièrnu mester bai tuma medida pa atendé ku e situashon finansiero malu ku pais ta pasa aden, nos famianan mas vulnerabel i nos penshonadonan meresé un maneho di sosten i protekshon di parti di gobièrnu den e área mas básiko di bida, ku ta di alimentashon.

For di djaluna último, lider polítiko di e partido, Suzanne Camelia Römer a splika ku den fin di siman nan partido tabatin un wikènt di estudio.  PIN a hasi un estudio profundo di e situashon di disponibilidat di fruta i bèrdura pagabel pa nos pueblo. Nos a konkluí ku mester trese kambio urgente i rápido den nos areglonan pa asina garantisá un pakete di alimento salú i pagabel pa nos pueblo.  Na promé lugá mester adaptá e fruta i bèrduranan den e areglo di Makutu Básiko mas pronto posibel i amplia e Makutu Básiko ku mas produkto, pa sigurá ku tur hende por kome sufisiente i salú.  Na di dos lugá mester adaptá e dekreto riba preis máksimo di fruta i bèrdura pa frena e subida apsurdo i indebido di preis.

Na di tres lugá mester modernisá e dekreto riba prohibishon di importashon di fruta i bèrdura i amplia esaki ku tur produkto ku por i ta ser produsí lokalmente. Di e forma aki  ta logra fruta mas barata i ta stimulá na mes momentu kuponan di trabou lokal i tambe nos mes ekonomia.

Segun PIN nan minister enkargá ku agrikultura, esta minister di Salú, Medio-Ambiente i Naturalesa, sra. Suzy Camelia-Römer (PIN), su maneho pa mehorá kalidat di nutrishon atraves di mihó i mas produkshon lokal di fruta i bèrdura, ya ta bon konosí. Evaluashon di e merkado di fruta i bèrdura na Kòrsou ta mustra ku mester modernisá e instrumentonan di lei ku ta disponibel pa e tim Multidisiplinario por aktuá mas fuerte. Ta resultá ku tin un dekreto di 1984 ku ta protehá kultivo di 23 fruta i bèrdura ku ta ser produsí lokal. Un investigashon ta mustra ku tin alrededor di 70 tipo di fruta i bèrdura ku por ser produsí lokal. Di esei tin un kantidat ku ta ser produsí lokal, pero no ta inkluí den e areglo di 1984.

Tambe tin un dekreto riba preis máksimo pa algun fruta i bèrdura ku ta data di 1997. Komparashon di preisnan máksimo di e dekreto ku preisnan di benta promedio di fruta i bèrdura di algun supermerkado i minimarket na sèptèmber 2018 ta mustra un grado haltu di violashon di e dekreto. Esaki ta motibu pa hiba un kòntròl mas rigoroso riba preis di fruta i bèrdura. PIN ta urgí gobièrnu pa añadí i enfatisá kòntròl rigoroso riba preis di fruta i bèrdura na trabounan di e tim multidisiplinario ku a bin ta hasi un hopi bon trabou pa ku entre otro kòntròl riba pèrmit di lokalidatnan, kalidat i higiena den establesimentunan ku ta bende kuminda.