Atrakadónan a drenta víktima su vehíkulo ora e tabata para na lus kòrá

10667
Willemstad— Víktima di e atrako na Baai Macola a splika ku tabata na e lusnan di tráfiko na Parera a drenta den su vehíkulo i a sekuestr’é bai kuné na Baai Macola unda e la wòrdu maltratá i atraká.

 

E víktima a splika ku e tabata para na e lusnan di tráfiko na Parera den direkshon di Saliña ora ku e la tuma nota di dos hòmber basta yòn krusa kaya pega banda di su vehíkulo. Promé ku e por a reakshoná e dos hòmbernan aki a drenta den su vehíkulo unda un di nan a bai sinta  su tras i a pone un opheto na su kabes indikando pa e kuminsá kore. A pone lora na e pòmp di gasolin na Parera Kue direkshon di  Baai Macola nèt banda di Marine Kazerne. Segun e víktima miéntras e tabata kore e la pensa di kore bai na e porta d Kazerne pa buska yudansa pero no a mira niun militar para einan. A pone para e outo na Baai Macola unda a kuminsá maltrat’é puntr’é pa sèn i tambe su karchi di bankomátiko. E víktima a splika ku ta 50 florin so e tabatin den su poder i a entrega esaki na e tiponan ku tabata maltrat’é ku palu. Dado momento a dale ku palu den su wowo pone ku e no por a mira mas. E la bin ku e idea pa ban kas kuné pa asina e por a kue su karchi di bankomátiko. E tiponan a ranka su paña for di su kurpa i kier a hink’é den bahul pa bai bent’é na shut segun nan a bisa. E víktima a roga nan pa bai su kas kuné pa kue e karchi i tabata e ora ei ku a orden’é pa drumi riba e stul patras unda a baha e lomba di e dos stulnan dilanti i primié abou. Segun e víktima ora e la sinti ku e outo a kuminsá kore i a yega na e lusnan di tráfiko na altura di e pòmp di gasolin e la forsa lanta i kue un di e guynan tene na altura di su wowo i a kuminsá hinka dede den su wowo. E tipo a kuminsá grita pa yudansa miéntras e otro ku tabata stür a kuminsá batié ku un pida palu pa despues para e outo kantu di kaminda pa bin yuda si kompañero. Tabata e ora ei ku e la bula baha for di e outo na bokser i a kuminsá kore pidi pa yudansa. Tabata te na altura di e estatua riba Fokkerweg ku un suidadano a para i yama polis pe ku a presentá mas despues. E tiponan a bai ku su outo i mas despues polis a bin haña esaki ainda sende den e kura kaminda ántes tabata Sedreko.