E fransesnan ta bini pa ripití!

Caribbean Club Shield’ na Kòrsou di 5 te ku 15 aprel benidero

677
E kampeon di Martinique, Club Franciscain.
Stephane Abaul, ábil bolante i miembro di selekshon di Martinique na Kòrsou hungando pa Club Franciscain.
BRIEVENGAT—E ekipo di Martinique, Club Franciscain, ta e aktual kampeon di ‘Caribbean Club Shield’ i nan ta bini Kòrsou ku niun otro intenshon, sino pa ripití nan titulo di 2018. Ku hungadónan den nan plantel kende a partisipá pa nan selekshon nashonal durante Concacaf Gold Cup di 2013 i 2017, e “Pretu ku Bèrdènan”, ta dirigí pa sigui den e siguiente rònt di Kampeonato di Karibe.

Kisas e mihó…
Club Franciscain kisas ta e ekipo mas mihó ku ta yega e kampeonato. Nan te e organisashon di futbòl mas eksitoso di Martinique i tin hungadó “full pròf” den nan seno. Ademas, tin hungadó ku hamber pa yega final i kisas topa ku Jong Holland, despues ku selekshon di Kòrsou den nan stadion nashonal, a kita posibilidat pa Martinique bira kampeon di Karibe. Esaki a sosodé na 2017, durante e último kampeonato di Karibe na nivel di selekshon.

Logronan
Club Franciscain tin un kantidat di 18 titulo di kampeon nashonal riba nan nòmber. Esaki ta inkluí 2017 i 2018 miéntras e aña aki nan ta enkabesá e tabla di posishon na Martinique. Aparte di esei nan tin 15 torneo di kopa nashonal den nan bolsa. Na nivel di Karibe, Franciscain ta den nan mihó forma. Te ainda e klup a paresé na solamente dos Kampeonato di Karibe pa Klup, pero na 2018 a titulá kampeon di e Pre Temporada di Champions League di Karibe, ku ta e aktual ‘Caribbean Club Shield’.

Yann Thimon, otro miembro di selekshon di Martinique ku a partisipá na Gold Cup i ta hunga den Club Fanciscain.

Despues di a gana e ekipo di Sürnam, Inter Moengotapeo, na 2018 den e wega final, e Pretu ku Bèrdènan di Martinique a sigui pa e siguiente rònt di e kampeonato di klup di Karibe. Einan e fransesnan a sorpresá tur siguidó di futbòl karibense, logrando e di kuater lugá ku un viktoria di 2-1 kontra di Central FC di Trinidad. E viktoria a pone nan yega e rònt eliminatorio di Campions League di CONCACAF. Pero un fayo garafal di nan arkero, a pone ku nan no a logra sigui, despues di un derota na pinalti kontra di Deportivo Walter Ferreti di Nicaragua.

“Pul di morto”
Un kos ta sigur, ku nivelnan haltu konkistá ainda bou di nan nanishi, e martinikeñonan ta bini Kòrsou ku ala di falki. Pero nan pul no ta fásil. Pul D, ta e “pul di morto”. Eiden tin futbòl di kaliber ku un pais sup kampeon i di 4 puesto durante di e último Club Shield ku Franciscain a hunga na 2018 pa bira kampeon. Pa nan di malu, nan ta bolbe bin topa un ekipo di Sürnam riba nan pasio pa gloria.

Defensa Nicolas Zaire, tambe ta hunga pa selekshon nashonal di Martinique.

SV Robinhood
E biaha aki ta toka turno pa SV Robinhood. E 24 biaha kampeon di Sürnam, ta bini pa duna revancha ku nan kompatriotanan a sufri na man di e fransesnan. Nan ta topa otro den e promé wega dje pul i esun ku gana probablemente lo pasa pa e siguiente rònt.

SV Dakota
Aruba na 2018 a sali na di kuater lugá dje torneo i e biaha aki nan ta bini ku Dakota. E muchanan dje isla bisiña ta bini Kòrsou pa solamente duna un mihó prestashon ku Nacional di Aruba aña pasá. Ku esaki Franciscain no mester balotá sino nan por keda afó. Tur kos ta dependé di nan promé wega 5 di aprel próksimo kontra di e trabuko surinameño, Robinhood.

Patrick Percin
Nan hungadó mas konosí i eks kapitan di selekshon ta e delantero Patrick Percin. Percin kende ku su 15 aña a firma kua e ekipo di futbòl franses Auxerre, no kier a keda Oropa i ta bolbe su isla unda el a hunga mayoria di su karera na kas. Ounke e tin 42 aña, e tabata e klave den e ekipo pa nan logra e titulo kampeonil lokal i di ‘Caribbean Club Shield’. Patrick a fungi alabes komo kapitan di e selekshon nashonal di Martinique.

Stephane Abaul i Christophe Joubon
Aparte di Percin, e pretu ku bèrdènan ta trese Kòrsou dos di nan mihó bolantenan den kampeonato nashonal i ámbos ta forma parti di e eksitoso selekshon nashonal dje pais. Ta trata di Stephane Abaul i Christophe Joubon.

Futbolistanan Thimon
Otro miembro di e selekshon nashonal ku ta hunga pa nan ta e peligroso bolante atakante Yann Thimon. Yordan Thimon, kende a hunga pa e selekshon di Martinique na 2017 durante Kopa di Karibe, ta un otro defensa fuerte dje ekipo riba ala robes, kende tambe lo ta na Kòrsou.

Kiper Olivier Rosa Arsene
Nan  hòmber bou di lata lo ta Olivier Rosa Arsene, kende ta un otro miembro di nan selekshon nashonal ku a hunga na 2017 weganan klasifikatorio.

Hungadónan ku tabata na Gold Cup
Entre esnan kende ta bini Kòrsou ku a hunga Gold Cup pa Martinique na 2017 ta, Nicolas Zaire (defensa), Stephane Abaul (bolante), Yann Thimon (Bolante/Atakante) i Johny Marajo, delantero.