A likidá fundashon di gobièrnu ku a fia Santa Barbara 16 mion dòler

2026
Tin duda: tin duda si minister Gijsbertha ta na altura si e surplus mionario ku ta bayendo Korpodeko miéntras parlamento no a risibí dokumentashon.
Punda— Tin un misterio ta sirkulando rondó di re-alokashon di un fondo mionario ku originalmente tabata destiná pa desaroyo ekonómiko. Ta trata miónes riba kuenta di e fundashon Stichting  Economische Ontwikkeling. Na yüli 2015 a destitui e fondo, pero informashon riba 78 mion florin aloká mediante fiansa emití i depósito riba banko, a sigui ku pregunta.

SEO su meta tabata pa promové i stimulá ekonomia. Den kuadro di esaki e fundashon a emití algun fiansa. Entre nan esun di mas grandi ta desaroyo di e kancha di gòlf na Santa Barbara den forma di un fiansa balorá na 16 mion dòler, sin kota di interes inkluí. Mas aleu e fundashon a fia sèn na Kura Hulanda i konstrukshon di e brùg na Simpsonbay St. Maarten.  Na febrüari último, e fundashon a wòrdu likidá, unda a emití un boletin ku un saldo positivo a wòrdu deskontá, despues di a paga e.o. kreditornan.  A keda un surplus miéntras pa e surplus aki, segun e boletin di likidashon tin un plan establesé. E suma di e surplus no ta konosí, pero te ku 2015, momento a destitui e fundashon tabatin un kuenta di 27 mion florin kèsh miéntras un bolsa di fiansa di riba 30 mion dòler ku e fundashon a fia na e.o. Santa Barbara, Kura Hulanda i algun proyekto mas. Tur e fiansanan aki tabata aktivá riba balans di e fundashon te ku 2014. Tin chèns ku e surplus aki por ta balorá na e bolsa di fiansa i e aktivo riba kuenta di banko ku ta totalisa kasi 78 mion florin.

Vigilante a drenta den kontakto ku minister di Asuntunan Ekonómiko sr. Kenneth Gijsbertha kende a keda di laga investigá e kaso, miéntras eks presidente di e fundashon no tabata por a duna muchu komentario. Aktualmente, tin desishon avansá pa manda e bolsa di fiansa i depósitonan na Banko pa Korpodeko. Korpodeko su akshonista mayó ta gobièrnu, pero ta keda un entidat privá. E plaka ku e fundashon tabatin, tabata prosedente di gobièrnu antiano i durante repartishon di  vienes, St. Maarten tambe tin kleim riba e bolsa mionario.

E situashon ta unu inklaro. Na promé lugá, no ta konosí den ki forma e traspaso di e depósitonan na banko plùs e fiansa a tuma lugá. Awor ku gobièrnu ta den un desekilibrio finansiero, no ta konosí tampoko si Parlamentu ni tampoko Hunta di Ministerio ta na altura di e likidashon ku a tuma lugá na febrüari último. Vigilante a por a komprondé ku e fundashon a atkerí servisionan di un konsultent eksterno pa duna konseho kon pa re-aloka e aktivonan pero e desishon no ta unu transparente. Ta un hecho ku tantu e fiansa hasi na Santa Barbara, ku ta pagando bek, a sali for di fondonan di gobièrnu miéntras e interes riba e fiansa a duna e fundashon ganashi. E fundashon mester tin un kuenta anual ku Minister di Ekonomia ta na altura di dje pa por presentá esaki den Hunta di Minister. I finalmente, Parlamento di Kòrsou, no a risibié ningun notifikashon den kua forma e 78 mion florin ku tabata propiedat di gobièrnu a wòrdu re-aloka na Korpodeko. Un bolsa di 78 mion “grátis” riba balans di Korpodeko ta drecha e solvabilidat di e banko konsiderabel. Pero ku mesun montante aki e kapasidat di kapital propio di gobièrnu ta bai den negativo.