Cova ta bisa ku nan a splika minister i minister tabatin komprenshon i a bisa pa ban traha un plan ekonómiko.
Willemstad,– Solidaridat sindikal a keda skucha pa minister Kenneth Gisjebrtha i nan ta bisa ku mester stòp di hasi manera CFT kier.

Señor Errol Cova a splika Vigilante ku minister a bisa lokual el a bisa den komunidat esta ku nan ta haña nan fòrsa pa tuma e medidanan.E konsehero di solidaridat sindikal a bisa ku nan a bisa minister lokual nan ta pensa for di tempu ku minister a kuminsá bisa for di 2017 ku ta bai tuma medida, esta ku sindikatonan  mester tin partisipashon i ku sindikatonan  ta keda resistí kontra e medidanan.

Cova ta bisa ku ta for di e tempu ei nan a bisa ku ta nos ekonomia mester bai drecha. “Si bo drecha finansa i no drecha ekonomia, e problema ta keda meskos”, asina Cova ta bisa. E ta bisa ku mester bisa CFT ku no por tuma medida sin tene kuenta ku asuntunan sosial. Mester bisa CFT warda un ratu i mester bini ku un plan stratégiko, no un ‘groeistrategie’ kaminda bo ta dependé di otronan ku ta disidí kiko ta sosodé.Cova ta bisa ku nan a splika minister i minister tabatin komprenshon i a bisa pa ban traha un plan ekonómiko. A bisa minister ku e mester wak kon ta hasié, paso pa sindikatonan Kòrsou mester forma un moketa i hasi nos bèst pa bini ku plan ekonómiko.

“Si bo keda kòrta pa kumpli ku CFT bo no ta bai niun kaminda i tambe ta asina ku e pueblo aki no por karga mas medida”, segun Errol Cova.Cova ta bisa ku el a splika minister ku mester lòs for di CFT i si Hulanda bèrdat kier yuda, mester traha un plan ekonómiko i pidi Hulanda pa yuda.Cova ta sigui bisa ku a splika minister tambe ku nan ta keda resistí kontra e medidanan. E ta bisa ku minister a puntra si por karga e medidanan aki i Cova a bisa ku nò.

Por último e konsehero di sindikatonan ta puntra kiko lo pasa si nos bisa CFT ku nos no ta akseptá loke nan kier , e ta puntra si nos ta haña sota serka CFT den un kaso asina.