Minister di Hustisia a firma dekreto gubernamental pa saka 11 blou blou fo’i IBT

Sin na niun momento a laga nan defendé nan mes

1338
Segun e trahadónan di Prizon ku na e momentonan aki KORSOU no tin MINISTER DI HUSTISIA sino MINISTER DI INHUSTISIA.
Willemstad—–Vigilante a bin komprondé ku ounke e sindikato a reuní ku Minister di Hustisia riba algun punto ku a bin ta tumando lugá den Prizon  di e miembronan di IBT  tòg e titular ta firma algun MB esta dekretonan gubernamental  pa saka algun miembro di IBT for di e team aki sin a duna esaki nan oportunidat pa defendé nan mes kontra di algun karta di direktor fecha 1 novèmber 2018 e asina yama verweer.

Ta asina ku e hefe di seguridat den prizon kier a bin ku un team di blou blou nobo. Por a komprondé ku ta trata di trahadónan den prizon ku ainda no tin e training nan kalifiká  i adekuá pa atendé ku prezu pero ku tòg e hefe di seguridat kier hinka den e team di blou blou ku ya ta konsistí di 30 miembro. Ounke ku asta a splika ku no tin sèn pa kubri training ni pago di e miembronan nobo pa bai den e team di IBT, djasabra último riba órden di sr Gimena  ku konosementu di Minister di Hustisia  a sigui ku  algun tèst  pa e grupo nobo i tambe algun di esnan ku ya a bin ta forma parti di IBT for di 2010.

Vigilante lo bai redaktá kiko ta henter e problema den e instituto. E problema a kuminsá ora ku e hefe di seguridat riba su mes a laga un grupo di personal kuminsá funshoná komo IBT esta blou blou,  sin ku esaki nan a kaba e training / tèst di IBT anto banda di esaki gobièrnu no por a kuminsá paga nan pa dos motibu ku unu ya e miembronan tabata  30 ( esta no mester di mas miembro)  pa lei i tambe e grupo nobo no tabata sertifiká konforme e nivel di DJI di Hulanda. Aki nan a kuminsá un guera interno unda e hefe di seguridat a kuminsá pone e grupo nobo kontra e grupo bieu ku si ta sertifiká i tambe ku si tin un MB ( ministriele Beschikking) i tambe ku si ta kobra e kompensashon korespondiente. For di e momentonan ei Grupo di servisio ABVO a proponé na Direktor Floran pa pidi gobièrnu un pèrmit pa ekspandé e team ku mas miembro  pa asina por a solushoná e problemátika aki. Apesar di esaki team di maneho  di prizon   a keda yag riba e grupo ku ta tei fo’i promé . Te ku den e luna aki dor di HRM di Prizon a wòrdu entrega na 11 miembro di IBT un MB ku ta indiká ku entrante promé (1) di mart 2019 nan no  ta forma parti mas di IBT i alabes nan no ta bai gosa mas di e kompensashon korespondiente. Tur esaki a sosodé sin ku e 11 miembronan aki a wòrdu skucha i mustra ta kua ta e motibu pa kual a saka nan di un forma unilateral for di e team di IBT. Pues ningun ora so nan no a haña oportunidat pa nan defendé nan mes kontra di e supuesto karta di direktor fecha 1 novèmber 2018, ku a wòrdu manda pa Minister komo motibu pa saka nan for di IBT. Den e kaso aki tambe Minister a firma e kartanan sin a laga e trahadónan defendé nan mes.  Esta kier saka sigur 11 miembro di e IBT ku si ta kalifiká pa hinka miembronan nobo.  Pues esaki ta nifiká ku e grupo di miembronan ku a keda ekspulsá for di e team ariba menshoná ta keda perhudiká aunke nan ta e miembronan kalifiká i sertifiká pa e dosentenan hulandes di DJI. Minister sabiendo ku e proseso no a kana konforme lei i prosedimentunan hurídiko tòg ta skohe konsientemente pa violá tantu LMA komo e otro lei i reglanan korespondiente.  Por a komprondé ku  djabièrnè  último e sindikato di e trahadónan den e  kaso aki ABVO a laga sa bon kla i raspa ku Minister lo tende pronto di e reakshon di e sindikato  ABVO. Bou di ningun sirkunstansia nan  no ta tolerá abuzu ni inhustisia kontra di nan miembronan.

E trahadónan a splika ku nan ta  hopi desapuntá, defroudá i desgustá ku e forma kon tantu sr. Floran, sra Gimena i Minister Girigorie a trata  e miembronan di IBT  den e kaso aki.