Hòmber ku a maltratá pareha turista pa bai ku nan outo arestá

Bon trabou di Polis

4534
 Willemstad——Bon trabou di Polis i tambe ku yudansa di habitantenan di Banda Bou a logra di arestá un tipo ku a maltratá un pareha turista ku e intenshon di kita nan tas i bai ku e vehíkulo ku nan tabatin di hür.

Djabièrnè 5 di aprel 2019, alrededor di 15.22 or, Sentral di Polis a risibí informashon di un kaso di atrako ku a tuma lugá na Lanthùis Kenepa.

For di un investigashon ku polis a hasi na e sitio, a resultá ku un hòmber ku kuchú den su man a atraká un pareha turista. E dama a deklará na e agentenan na momento ku nan a sali for di e sitio bayendo e lugá di parker, nan a mira un hòmber ku un kuchú den man ta biniendo den nan direkshon. Bou di menasa e hòmber sospechoso aki a pidi su kasá pa dun’é e tas di lomba ku e tabatin. Na e momento ku el a bai yuda su kasá e hòmber sospechoso a agredié den su kara. Despues di esaki e sospechoso a purba di bai ku nan outo, pero e no a logra den e intento aki tampoko i a bandoná e sitio. Polis a kuminsá ku un búskeda den e área i a señalá e sospechoso den área di playa Jeremi. Mesora alrededor di 15.50 or, polis a detené e hòmber aki ku tabata heridá i tabatin sanger na su kurpa. Ta trata di:

Ch.N.L. di 25 aña di edat, nasé na Jamaica, komo sospechoso den e kaso ariba menshoná.

A presentá e sospechoso dilanti un Fiskal Ouksiliar ku a ordená su enkarselamentu pendiente di mas investigashon.